खोज

दाङ, १८ कात्तिक ।

दाङको चेपे सोतामा झोलुङ्गे बनेपछि यात्रा सहज भएको छ   ।  घोराही उपमहानगरपालिका -१र २ नम्बर वडा जोड्ने पुलले नागरिकको जीवन परिवर्तन गरेको छ   ।

घोराही उपमहानगरपालिका -१  बाहुनटारीका ६३ वर्षकी  दुर्पती नेपालीलाई आफ्नै जीवनमा आएको परिवर्तन देख्दा निकै खुसी लागेको छ। घोराही  उपमहानगरपालिका -१ र २ को सिमानामा पर्ने चेपे सोताको बाटो ओहोरदोहोर गर्दा निकै समस्या हुने गरेको थियो ।

सोताको पारी घर छ  कुटानी पिसानी गर्ने देखि सरसामान किनमेल गर्न वारि आउनुपर्ने बाध्यता थियो । एक घण्टाको बाटो हिँडेर आवतजावत गरेको अझै ताजा छ।   तीन वर्ष अघि चेपे सोतामा बनेको झोलुङ्गे पुलले अहिले सहज भएको छ।  सोताको पानीलाई छेक थुन गरेपछि जलाशय बनेको छ । जलाशयको पानीले  बाह्रै महिना तरकारी खेती हुने गरेको उनले बताइन् ।

तरकारी खेतीले गाउँले सबैको खेतबारीमा सधैँ हरियाली हुन्छ।
झोलुङ्गे  पुलले यात्रा सहज र समय व्यवस्थापन भएको सोही वडाका बासिन्दा रिता चौधरीले बताइन् । उनले भनिन् , पुल बनेपछि यात्रा सहज भएको छ, १ घण्टा हिँड्नुपर्ने बाध्यता हटेको छ   । दैनिक तरकारी बिक्री गर्न बजार आउँदा सजिलो भएको छ।  पुल नहुँदा गाउँमा फलेका तरकारी बारीमै खेर जान्थ्यो । पुल बनेपछि व्यापारी नै गाउँ आउने र खरिद गरेर लैजाने गरेका छन् ।

खोलाको पानी तरेर यात्रा गर्नुपर्दा जोखिम धेरै थियो । घोराही उपमहानगरपालिका वडा नम्बर १ का अध्यक्ष  राममणि पाण्डेले  पुल बनेपछि सबै नागरिक खुसी भएको बताए ।   “यो पुलमा पुग्ने जो–कोहीको मन खुसी  हुन्छ”, उनले भने, “ सोता देख्दा सानो भए पनि गहिरो थियो धेरै जोखिम थियो , यो  क्षेत्रमा निर्माण भएको पुल पाहुनाका लागि आकर्षक गन्तव्य बनेको छ ।”

पुल हेर्न दैनिक युवायुवतीको घुइँचो लाग्ने गरेको छ ।  पुल गाडी ,मोटर भन्दा पनि मानिसलाई यात्रा गर्न सहज होस् भनेर बनाइएको उनले बताए ।