खोज

बुटवल, १८ कार्तिक ।

बुटवलमा भएको एक कार्यक्रममा बोल्ने वक्ताहरूले देशभरका पार्कहरूको विशिष्टीकरणमा जोड दिएका छन् ।

सामरिक महत्त्व बोकेको मणिमुकुन्द सेन उद्यान संरक्षण समितिको सोमबार सम्पन्न १७ औ वार्षिक साधारण सभामा बोल्ने वक्ताहरूले उद्यानहरूलाई विशिष्टीकरण गर्न सके पर्यटकहरूको आर्कषण बढ्ने बताएका हुन ।

कार्यक्रमको प्रदेशका पूर्वमन्त्री भोजप्रसाद श्रेष्ठ र समितिका संरक्षक तथा बुटवल उपमहानगरपालिकाका नगरप्रमुख खेलराज पाण्डेयले संयुक्त रुपमा उद्घाटन गरे ।

कार्यक्रममा लुम्बिनी प्रदेशका पूर्वमन्त्री भोजप्रसाद श्रेष्ठले अतिक्रमणको चपेटामा रहेको ऐतिहासिक र सामरिक महत्वलाई जोगाउने अभियानमा यहाँका पूर्वजहरुको योगदान रहेको बताए ।

फुलबारीको सामरिक महत्वलाई बचाउँदै थप प्रचारप्रसारलाई जोड दिनुपर्ने उनको सुझाव छ । जनजीको आन्दोलनबारे उनले भ्रष्ट्राचार र समाज रूपान्तरणका लागि भएको बताए । तर जुन उद्देश्यलाई लिएर आन्दोलन भएको भएको त्यो प्राप्ति नभएको दाबी गरे ।

पाल्पाली राजा रुद्र सेन द्घितियद्घारा १५ औ शताब्दीमा आधार राखिएको यस क्षेत्रमा शितकालिन दरबार तथा प्रशासनिक केन्द्र रहेको ऐतिहासिक तथ्यमा उल्लेख छ ।

कार्यक्रममा समितिका संरक्षक तथा बुटवल उपमहानगरपालिकाका नगरप्रमुख खेलराज पाण्डेयले स्थानिय सरकारको संरक्षणमा रहेको पार्कको विकास र संरक्षणमा निरन्तर सहकार्य र पहल गरिरहेको बताए ।

समितिलाई अध्ययन केन्द्रको रुपमा विकास गर्न कार्यविधि बनाएर अघि बढ्न जरुरी रहेको भन्दै यसलाई अघि बढाउन पालिका तयार रहेको बताए । समृद्धि बुटवल बनाउनका लागि यहाँका पुराना र महत्त्वपूर्ण स्थलहरूको प्रचार र पहिचान बाहिर ल्याउन जरुरी रहने उनले बताए ।

फूलबारीलाई थप नयाँ उचाइमा लग्ने गरी आर्थिक र प्रशासनिक नियमावली बनाउन उनले सुझाव दिए । पुरातत्त्व विभागसँग समन्वय गरी अघि बढाउन जरुरी छ ।

कार्यक्रममा समितिका अध्यक्ष माधव प्रसाद नेपालले गत वर्ष दिगोपनाका आधारहरू मजबुत गर्न, प्रशासनिक दक्षता बढाउन, आम्दानीका वैकल्पिक श्रोत सृजना गर्न र समुदायसँगको साझेदारीलाई संस्थागत बनाउन मदत गरेको छ ।

पुरातन शिवालय, बिष्णुपादुका, मजारस्थान तथा स्वामीनारायणले ३०० वर्षअघि विचरण गरेको स्थानसमेत हुँदा धार्मिक सहिष्णुता र सांस्कृतिक सहअस्तित्वको उत्कृष्ट घोतक बनेको उनले बताए । उद्यान केवल घुमफिर गर्ने ठाउमात्र नभई यो अध्ययन, चिन्तन र आत्मिक अनुभुतिको पनि पवित्र स्थल बनेको उनको दाबी छ ।

बुटवल उपमहानगरपालिकाका उपप्रमुख साबित्रा देवि अर्याल, राष्ट्रिय उद्यान महासंघ नेपालका अध्यक्ष खेम लुईटेल, समितिका सल्लाहकार निर्मल जिसि, समितिका उपाध्यक्ष रमेश नेपालले पार्कको विविधीकरणमा जोड दिनुपर्ने बताए ।

बुटवलको मणिमुकुन्द सेन उद्यानमा एक वर्षको अवधिमा ५ लाख ४७ हजार १९९ जना पर्यटक भित्रिएका छन् । सेनवंशिय भग्नावशेष दरबार रहेको सामरिक महत्त्व बोकेको यस क्षेत्रमा अध्ययन अवलोकनका लागि आन्तरिक र बाह्य पर्यटकहरु आउने गरेका छन् ।

जसमा ७४ हजार भारतीय र १७५ जना तेस्रो मुलुकका पर्यटक रहेको उद्यान समितिले जनाएको छ । आर्थिक वर्षमा ४ करोड १० लाख ३४ हजार रुपैयाँ आम्दानी भएको छ ।  समितिमा ६०१ सदस्यहरू आबद्ध छन् ।