खोज

काठमान्डौ, १८ कार्तिक ।

नेपाली कांग्रेसका महामन्त्री गगन थापा आज पार्टीको केन्द्रीय समिति बैठकमा १५औँ महाधिवेशनको कार्यतालिका पेस गर्ने भएका छन् ।

कार्यवाहक सभापति पूर्णबहादुर खड्काले सोमबार दिउँसो १ बजेदेखि साँझ ६ बजेसम्म ललितपुरको धोविघाटमा राखेको छलफलमा थापाले आजको बैठकमा आफ्ना धारणा राख्ने र महाधिवेशन प्रस्ताव प्रस्तुत गर्ने सहमति भएको थियो ।

कार्यतालिका अनुसार आज दिउँसो १ बजे सानेपास्थित पार्टी केन्द्रीय कार्यालयमा बस्ने बैठकमा सुरूमा कार्यवाहक सभापति खड्काले सम्बोधन गर्नेछन् । त्यसपछि महामन्त्री थापाले आफ्ना विचारसहित १५औँ महाधिवेशनको प्रस्ताव पेस गर्नेछन् ।

थापाले यसअघि केन्द्रीय कार्यसम्पादन समितिमा विभिन्न विकल्पसहित महाधिवेशन कार्यतालिका प्रस्ताव गरेका थिए, तर सभापति शेरबहादुर देउवा पक्षका नेताहरूबीच सहमति जुट्न नसकेपछि प्रस्ताव केन्द्रीय समितिमा पेस हुन सकेको थिएन ।

थापानिकट एक केन्द्रीय सदस्यका अनुसार, उनी आज मंसिरमै वा ढिलोमा पुस १६ देखि १९ गतेभित्र महाधिवेशन गर्न सकिने प्रस्ताव पेस गर्ने तयारीमा छन् । “महामन्त्री थापाले आज १५औँ महाधिवेशनको कार्यतालिका पेस गर्नुहुन्छ,” ती सदस्यले भने, “देउवा पक्षले भने चुनावपछि गर्ने तयारीमा छ ।”

देउवा पक्षका पदाधिकारीहरू — विमलेन्द्र निधि, प्रकाशमान सिंह, कृष्णप्रसाद सिटौला, प्रकाशशरण महत, शशांक कोइराला लगायत प्रतिनिधिसभा निर्वाचनपछि महाधिवेशन गर्नुपर्ने पक्षमा छन् । तर महामन्त्री थापा, अर्का महामन्त्री विश्वप्रकाश शर्मा र नेता शेखर कोइराला चुनावअघि नै महाधिवेशन गर्नुपर्नेमा अडिग छन् ।

सहमहामन्त्रीहरू महालक्ष्मी उपाध्याय (डिना), फरमुल्लाह मन्सुर, भिष्मराज आङ्देम्बे, कार्यसम्पादन समिति सदस्य रमेश रिजाल र जिपछिरिङ लामाले पनि चुनावअघि महाधिवेशन गर्नुपर्ने धारणा राख्दै आएका छन् ।

यसैबीच देउवा निकट केन्द्रीय सदस्यहरूले सोमबार नयाँ बानेश्वरमा भेला गरी प्रतिनिधिसभा चुनावपछि वैशाखमा महाधिवेशन गर्न उपयुक्त हुने निष्कर्ष निकालेका छन् । उनीहरूले यही प्रस्ताव आजको केन्द्रीय समिति बैठकमा लैजाने तयारी गरेका छन् ।

पार्टी स्रोतका अनुसार, देउवा पक्षको प्रस्तावमा पुस १५ गतेभित्र क्रियाशील सदस्यता नवीकरण, घरदैलो र जागरण अभियान सञ्चालन, फागुन २१ को चुनावका लागि उम्मेदवार सिफारिस र त्यसपछि वैशाख २५ देखि २८ गतेसम्म १५औँ महाधिवेशन गर्ने कार्यतालिका समावेश गरिएको छ ।

यसैबीच विशेष महाधिवेशन माग गर्दै आएका महाधिवेशन प्रतिनिधिहरूले पनि आजै नयाँ बानेश्वरमा भेला आयोजना गरेका छन् ।