खोज

काठमान्डौ, १८ कार्तिक ।

पूर्वन्यायाधीश गौरीबहादुर कार्की नेतृत्वको जाँचबुझ आयोगले प्रहरी प्रधान कार्यालयलाई चेतावनीसहित पत्र पठाएको छ । आयोगले भदौ २३ र २४ गतेका घटनामा को–को प्रहरी फिल्डमा खटिएका थिए भन्ने विस्तृत विवरण मागेको २२ दिनसम्म पनि प्रहरी प्रधान कार्यालयले आवश्यक जानकारी नपठाएपछि चेतावनीपत्र पठाइएको हो ।

आयोग गठन भएको केही दिनपछि नै अध्यक्ष कार्कीले नेतृत्व गरेको टोलीले प्रहरी प्रधान कार्यालय, नक्सालमा ती दुई दिनका फिल्ड ड्युटीमा खटिएका प्रहरी अधिकारी तथा जवानहरूको विस्तृत विवरण मागेको थियो । तर, तोकिएको समयमा जानकारी नआएपछि आयोगले आइतबार पुनः पत्राचार गर्दै २४ घण्टाभित्र लिखित जवाफ पठाउन निर्देशन दिएको हो ।

आयोगले प्रहरी महानिरीक्षक ९आईजिपी० चन्द्रकुवेर खापुङकै नाममा पठाएको पत्रमा, “जाँचबुझ तथा न्यायिक आयोगलाई सहयोग नगरेमा मानहानीसम्बन्धी कानुनी कारबाही हुन सक्ने” चेतावनी समेत दिएको छ ।

प्रहरी स्रोतका अनुसार आयोगलाई विवरण पठाउने तयारी भइरहेको छ। “विवरण नपठाउने भन्ने होइन, हामी तयार गर्ने प्रक्रियामा छौं,” प्रहरी प्रधान कार्यालयका एक वरिष्ठ अधिकारीले बताएका छन् ।

आइतबार नै आयोगले अर्को पत्रमार्फत भदौ २३ र २४ गते काठमाडौं उपत्यकामा खटिएका प्रहरी इन्चार्ज तथा कमाण्डरहरूलाई उपत्यका नछोड्ने व्यवस्था मिलाउन पनि निर्देशन दिएको थियो । आयोगका अनुसार ती इन्चार्ज तथा कमाण्डरहरूलाई सोधपुछ र बयानका लागि बोलाइनेछ ।

नेपाली सेनाले सार्वजनिक गरेको विवरणअनुसार, भदौ २३ गतेका घटनामा २२ जनाको मृत्यु भएको थियो भने पछिल्ला दिनसम्म कुल मृत्यु संख्या ७६ पुगेको छ । तीमध्ये ४५ जनालाई सरकारले सोमबार सहिद घोषणा गरेको हो ।

सरकारले गठन गरेको जाँचबुझ आयोगलाई पाँच बुँदे कार्यादेश दिएको छ ।

भदौ २३ र २४ गते काठमाडौं लगायत देशका विभिन्न भागमा प्रदर्शनका क्रममा भएका भौतिक एवं मानवीय क्षतिको छानबिन गर्ने, घटना हुनुको कारण सम्बन्ध यकिन राय सुझाव दिने, भौतिक एवं मानवीय क्षतिसँग सम्बन्धित सूचना वा निवेदन ग्रहण गरी विश्लेषण गर्ने र कारबाहीको सम्बन्धमा आवश्यक राय दिने, भविष्यमा यस्ता घटना दोहोरिन नदिन अपनाउनुपर्ने उपाय तथा सुझावहरू पेश गर्ने र प्रतिवेदनमा उल्लेख भएका सुझावहरू कार्यान्वयनका लागि स्पष्ट कार्ययोजना प्रस्तुत गर्ने कार्यादेश उल्लेख छन्।