खोज

नवलपरासी, बर्दघाट ।

बर्दघाट नगरपालिकाले नगरवासीका लागि स्वास्थ्य सेवामा विशेष पहल गरेको छ ।

आर्थिक वर्ष २०८२/८३ मा स्वास्थ्य क्षेत्रमा बजेट व्यवस्थापन गर्दै नगरपालिकाले मोतियाबिन्दु भएका नागरिकका लागि निःशुल्क शल्यक्रिया कार्यक्रम सञ्चालन गरेको छ ।

परासीमा रहेको बिनोद निता कंडेल आँखा अस्पतालमा सो का लागि ५ लाख बजेट विनियोजन गरिएको छ भने  निःशुल्क रगत र यातायातका लागि २ /२ लाख बजेट विनियोजन गरिएको नगरपालिकाले जनाएको छ ।गत वर्ष १ सय ७८ जनाले निःशुल्क मोतियाबिन्दुको शल्यक्रिया गरेको नगरले जनाएको छ ।

त्यससँगै रेडक्रस सँग समन्वय गरि निःशुल्क रगत उपलब्ध गराउने र डायलासिस गर्नुपर्ने बिरामीलाई गौतमबद्ध अस्पतालसम्म आवतजावतका लागि निःशुल्क यातायातको सुविधा निःशुल्क गरेको छ। नगरपालिकाले विगत वर्ष देखिनै यी कार्यक्रमहरू अघि बढाएको छ ।

नगर प्रमुख शम्भुलाल श्रेष्ठका अनुसार, यी कार्यक्रमले स्वास्थ्य सेवामा पहुँच बढाउन र आर्थिक अवस्था कमजोर भएका नागरिकलाई राहत पुर्‍याउने उद्देश्य राखिएको हो ।

“नागरिकलाई स्वास्थ्य सेवामा सहज र मूलतः विपन्न नागरिकलाई निःशुल्क पहुँच सुनिश्चित गर्न नगरपालिकाले नीति तथा कार्यक्रममै यी कार्यक्रम समावेश गरिएको मेयर श्रेष्ठले बताए । स्थानीय तहले यो सुविधा प्रदान गरेपछि विगतका वर्षहरूमा यो सेवाबाट नगर बासीले लाभ लिँदै आएका छन् ।

उनका अनुसार, बर्दघाट नगरपालिकाले आगामी दिनमा थप स्वास्थ्य कार्यक्रमहरू पनि विस्तार गर्दै जाने तयारी गरेको छ ।