खोज

बुटवल, १७ कार्तिक ।

पूर्व–पश्चिम राजमार्गअन्तर्गत नारायणगढ–बुटवल सडकखण्डको दाउन्ने क्षेत्रमा सवारीसाधन नचलाउन प्रहरीले आग्रह गरेको छ । पानी पर्न रोकिए पनि सडक अत्यधिक हिलो र चिप्लो बनेको, साथै सवारीसाधन बिग्रिएर सडक एकतर्फी बनेका कारण यातायात सञ्चालनमा गम्भीर समस्या उत्पन्न भएको जिल्ला प्रहरी कार्यालय नवलपुरले जनाएको छ ।

प्रहरीका अनुसार दाउन्नेको पूर्वी र पश्चिमी दुबै खण्डमा सवारीसाधनको लामो लाइन लागेको छ । पश्चिमबाट पूर्वतर्फ बर्दघाट–दुम्किबास जाने सवारीसाधन केही मात्रामा पास भए पनि पूर्वबाट पश्चिमतर्फ गइरहेका सवारीसाधन अझै रोकिन बाध्य छन् ।

प्रहरी नायब उपरीक्षक डीएसपी मधु नेपालका अनुसार ठाउँ–ठाउँमा सवारीसाधन बिग्रिएपछि सडक एकतर्फी भएको हो, जसका कारण करिब १० किलोमिटरसम्म सवारीसाधनको लामो लाइन लागेको छ । “दाउन्नेको उकालोमा आधा दर्जनभन्दा बढी सवारीसाधन बिग्रिएका छन्, जसलाई तत्काल हटाउन कठिनाइ छ,” उनले बताए ।

लगातारको वर्षाले सडक हिलो र चिप्लो बनेपछि विगत पाँच दिनदेखि दाउन्ने सडकखण्डमा यातायात सञ्चालनमा समस्या आइरहेको छ । प्रहरीका अनुसार अहिले दाउन्नेदेखि होङसी सिमेन्ट गेटसम्म सवारीसाधनको लामो लाइन देखिन्छ ।

सडकमा अत्यधिक भीड बढेपछि प्रहरीले कावासोती, डण्डा, चोरमारा, अरुणखोला लगायत स्थानमा सवारीसाधनलाई ‘होल्ड’ गरेर राख्न थालेको छ ।

सडक विभागका अनुसार दाउन्ने सडकखण्डको १४ किलोमिटरमध्ये पश्चिमतर्फका करिब ३ किलोमिटर मात्र पूर्णरूपमा कालोपत्रे गरिएको छ । केही भागमा ढलान कार्य सकिएको भए पनि अधिकांश खण्ड अझै कच्ची र हिलाम्य अवस्थामा छन् ।

दाउन्नेको चार ठाउँमा कल्भर्ट निर्माण कार्य अधूरो रहँदा सडक एकतर्फी चलाइँदै आएको छ । ढलानको काम भइरहेका स्थानमा पनि सवारीसाधन एकतर्फी गुड्न बाध्य छन्, जसका कारण सामान्य वर्षा भए पनि यातायात सञ्चालन ठप्प हुने अवस्था दोहोरिँदै आएको छ ।

प्रहरीले सोमबार एक विज्ञप्ति जारी गर्दै दाउन्ने सडकखण्ड अत्यधिक जोखिमपूर्ण रहेको उल्लेख गर्दै यात्रु तथा चालकहरूलाई वैकल्पिक मार्ग प्रयोग गर्न अनुरोध गरेको छ ।