खोज

काठमान्डौ, १७ कार्तिक ।

शिक्षिका जानकी खड्का मृत्यु प्रकरणमा पक्राउ परेका जिल्ला शिक्षा समन्वय इकाई डोटीका शिक्षा अधिकृत तथा विद्यालय निरीक्षक गणेशबहादुर रावलको सोमबार सरकारी वकिल कार्यालयमा बयान लिइएको छ ।

जिल्ला प्रहरी कार्यालय डोटीका प्रहरी निरीक्षक नजराज जोशीका अनुसार सरकारी वकिलले घटनासम्बन्धी प्रतिवादी रावलको विस्तृत बयान सोमबार रेकर्ड गरेका हुन् ।

यसअघि असोज १५ गते बयान लिने तयारी भए पनि सरकारी वकिल जिल्लाबाहिर रहेका कारण सो दिन प्रक्रिया रोकिएको थियो । प्रहरी निरीक्षक जोशीका अनुसार, “अनुसन्धानको आवश्यकताअनुसार प्रतिवादीको बयान लिने काम भइरहेको छ,” भन्दै उनले पछि पीडित पक्ष र साक्षीहरूको पनि क्रमशः बयान लिइने जानकारी दिए ।

प्रहरीका अनुसार जाहेरी दर्ता भएपछि २४ दिनभित्र अनुसन्धान प्रतिवेदन सरकारी वकिल कार्यालयमा बुझाउनुपर्ने कानुनी व्यवस्था छ । त्यसपछि सरकारी वकिलले दुई दिनको म्याद थप गरी सबै प्रतिवेदन अदालतमा पेस गर्नुपर्ने हुन्छ ।

सोमबारसम्म घटना भएको ८ दिन र जाहेरी दर्ता भएको ७ दिन पूरा भइसकेका छन् । यसअनुसार अब प्रहरीलाई अनुसन्धान प्रतिवेदन बुझाउन १७ दिन बाँकी छ ।

कात्तिक १० गते डोटीको पूर्वीचौकी गाउँपालिका–१ निवासी २७ वर्षीया शिक्षिका जानकी खड्का घर नजिकैको रुखमा झुण्डिएको अवस्थामा मृत फेला परेकी थिइन् । जानकी बाजुराको बूढीगंगा नगरपालिका–५ स्थित भानोदय माध्यमिक विद्यालयमा गणित शिक्षिकाका रूपमा कार्यरत थिइन् । उनी कैलाली बहुमुखी क्याम्पसमा स्नातकोत्तर तहको चौथो सेमेस्टरमा अध्ययनरत थिइन् ।

जानकीले मृत्युअघि लेखेको पत्रमा शिक्षा अधिकृत गणेशबहादुर रावलले आफूलाई विवाहका लागि निरन्तर दबाब दिएको खुलासा गरेकी थिइन् । उनका अनुसार रावलले सामाजिक सञ्जाल फेसबुकमार्फत मित्रता गाँसेर लगातार मानसिक दवाव दिँदै आएका थिए ।

पत्रमा उल्लेख भएअनुसार, विवाहको प्रस्ताव अस्वीकार गरेपछि रावलले जानकीका भाइ प्रदीप खड्कालाई फोन गरी ‘तिम्रो दिदीले मसँग विवाह नगरे मारिदिन्छु’ भन्ने धम्की दिएका थिए । यसले जानकीमा थप मानसिक तनाव सिर्जना भएको पत्रबाट स्पष्ट भएको छ ।

घटनापछि मृतकका परिवारले दिएको जाहेरीका आधारमा प्रहरीले गणेशबहादुर रावललाई पक्राउ गरी अनुसन्धान अघि बढाएको हो । हाल प्रहरी र सरकारी वकिल कार्यालयले आवश्यक बयान र प्रमाण संकलन प्रक्रिया जारी राखेका छन् ।