काठमाडौं, १६ कात्तिक ।
नेकपा माओवादी, नेकपा एकीकृत समाजवादीसहित विभिन्न आठ वटा कम्युनिष्ट पार्टीहरूले एकता गर्ने सहमति गरेका छन् । सहमतिपत्रमा हस्ताक्षर गरेसँगै उनीहरूले पार्टीको चुनाव चिन्ह ‘तारा’ रहने उल्लेख विज्ञप्तिमार्फत जनाएका छन् ।
माओवादी केन्द्रको केन्द्रीय कार्यालय पेरिसडाँडामा भएको छलफलपछि आठ वटा राजनीतिक दलले एकताको सहमतिपत्रमा हस्ताक्षर गरेका हुन् ।
सहमतिपत्रमा माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधवकुमार नेपाल, जनसमाजवादी पार्टी नेपालका अध्यक्ष सुवासराज काफ्ले, नेपाल समाजवादी पार्टीका अध्यक्ष महेन्द्रराय यादव, नेकपाका महासचिव चिरन पुन, नेकपा समाजवादीका अध्यक्ष राजु कार्की, ने.क.पा. माओवादी समाजवादीका अध्यक्ष कर्णजित बुढाथोकी र ने.क.पा. साम्यवादीका अध्यक्ष प्रेमबहादुर सिंहले हस्ताक्षर गरेका छन् ।
सहमति अनुसार, एकता राष्ट्रिय महाधिवेशन कात्तिक १९ गते आयोजना गरिनेछ । साथै, आगामी छ महिनाभित्र पूर्ण राष्ट्रिय महाधिवेशन सम्पन्न गर्ने तयारी गरिएको छ ।
एकीकृत समाजवादीको केन्द्रीय समिति बैठकले केही दिनअघि मात्रै माओवादी केन्द्रसहितका वाम दलहरूसँग एकता गर्ने निर्णय गरेको थियो । उक्त निर्णय अनुसार आजको छलफलमा औपचारिक सहमति भएको हो ।
यो एकता नेपाली वाम राजनीतिको पुनर्संयोजन र शक्तिकेन्द्र एकीकरणतर्फको महत्वपूर्ण कदमका रूपमा हेरिएको छ ।
