खोज

काठमान्डौ, १६ कार्तिक ।

नेपाली कांग्रेसभित्र महाधिवेशनको मिति निर्धारण सम्बन्धी विवाद समाधानका लागि अहिले कार्यसम्पादन समिति बैठक जारी छ । ललितपुरको धोविघाटस्थित सिद्धार्थ कटेजमा बसेको बैठकमा केन्द्रीय कार्यसमिति बैठकमा महाधिवेशनको कार्यतालिका पेश नपाएको भन्दै बैठक बहिष्कार गरिरहेका महामन्त्री गगन थापासमेत उपस्थित छन् ।

कार्यवाहक सभापति पूर्णबहादुर खड्काको सभापतित्वमा बिहान १० बजेबाट सुरु भएको बैठकमा दुवै पक्षले प्रस्ताव गरेका समय मिलाएर महाधिवेशनको नयाँ तालिका बनाउन छलफल भइरहेको नेताहरूले जानकारी दिएका छन् । शनिबार पदाधिकारी बैठकमा महाधिवेशन कार्यतालिकाबारे छलफल भए पनि सहमति हुन सकेको थिएन ।

बिहीबारको केन्द्रीय समिति बैठकमा महामन्त्री थापा अनुपस्थित थिए भने शुक्रबार उनले अनुपस्थित नहुने बताएपछि सूचना टाँसेर बैठक आइतबार (आज) दिउँसो १ बजे सम्मका लागि स्थगित गरिएको थियो । तर, थापाले अझै पनि महाधिवेशन कार्यतालिका प्रस्तुत नहुँदासम्म आफू केन्द्रीय समिति बैठकमा उपस्थित नहुने चेतावनी दिइरहेका छन् ।

अर्का महामन्त्री विश्वप्रकाश शर्माले पुस १६ देखि १९ गतेसम्म १५औँ महाधिवेशन गर्ने वैकल्पिक कार्यतालिका प्रस्ताव गरेका छन् । कांग्रेसमा महामन्त्रीद्वय थापा र शर्माले पुसभित्र महाधिवेशन सम्पन्न गर्नुपर्ने अडान राखेका छन् भने संस्थापन पक्षले वैशाख अन्तिमसम्म महाधिवेशन गर्ने पक्षमा रहेको छ ।

यसबीच, युवा नेताहरूले ५४ प्रतिशत महाधिवेशन प्रतिनिधिको हस्ताक्षर सङ्कलन गरेर कार्यवाहक सभापति खड्कालाई बुझाइसकेका छन् । एक नेताका अनुसार सहमतिका लागि छलफल भइरहेको भए पनि सहमति हुने सम्भावना कम देखिएको छ ।