खोज

 काठमाडौं, १६ कात्तिक ।

नेकपा एमालेले युथ भोलेन्टियर फोर्स घोषणा गरेको छ । आइतबार भक्तपुरको गुण्डुमा जनसंगठन समन्वय संयन्त्रले आयोजना गरेको विशेष भेलाले यो घोषणा गरेको हो । कार्यक्रममा एमाले अध्यक्ष केपी शर्मा ओली र उनकी पत्नी राधिका शाक्यको पनि उपस्थिति रहेको थियो ।

कार्यक्रममा पोलिटब्युरो सदस्य महेश बस्नेतले युथ भोलेन्टियर फोर्सका केही आचारसंहिता पनि तयार गरिएको जानकारी दिए । उनले भने, ‘हामीले भक्तपुरमा पहिलोपटक युथ भोलेन्टियर फोर्सको घोषणा गरेका छौं ।

साथै भक्तपुरबाहेक ललितपुर, काठमाडौं, काभ्रे, रामेछापलगायत जिल्लामा पनि घोषणा गर्ने योजना छ ।’ उनका अनुसार यो युथ फोर्स घोषणा गर्न मधेश, पहाड र हिमालका संगठनका साथीहरूले सहयोग गरेका छन् ।

नेता महेश बस्नेतका अनुसार केपी ओली गुण्डुमा बस्न थालेपछि दुई महिनादेखि युवाहरू त्यस क्षेत्रमा खटिएका छन् । ‘२ महिनामा २ हजार युवा खटाइएका छन् र गुण्डुवासीको तर्फबाट कुनै गुनासो आएको छैन,’ उनले बताए ।

उनले थपे कि पुष्प श्रेष्ठ, अमित पौडेललगायतले अहिलेसम्म समन्वय गर्दै आएका छन् । युवा संघ, भूपू सैनिक संगठन, एमाले भक्तपुर लगायतका समूहले नेताहरूको सुरक्षामा काम गरिरहेको जानकारी पनि उनले दिएका छन् ।

बस्नेतले विगतमा युथ फोर्स निर्माण गरेर माओवादीको आतंक हटाइएको उदाहरण दिँदै, अहिले पनि सबै खालका अराजकता विरुद्ध युथ भोलेन्टियर फोर्सले काम गर्ने बताए ।