खोज

काठमान्डौ, १६ कार्तिक ।

गत शुक्रबार स्थगित भएको नेपाली कांग्रेसको केन्द्रीय कार्यसमिति बैठक आज बस्ने भएको छ । बैठक आज दिउँसो १ बजे पार्टी केन्द्रीय कार्यालय, सानेपामा बस्ने पार्टीका मुख्यसचिव कृष्णप्रसाद पौडेलले जानकारी दिएका छन् ।

कांग्रेसमा उत्पन्न महाधिवेशनसम्बन्धी विवाद समाधानका प्रयास असफल भएपछि शुक्रबारको बैठक स्थगित गरिएको थियो । पार्टीभित्र डा. शेखर कोइराला नेतृत्वको इतर समूहले आगामी मंसिरभित्रै नियमित महाधिवेशन गर्नुपर्ने अडान लिएको छ । डा. कोइरालाले एक वर्षअघि देखिनै पार्टीको १५औँ महाधिवेशन २०८२ मंसिरभित्र सम्पन्न हुनुपर्ने धारणा सार्वजनिक गर्दै आएका छन् ।

शेरबहादुर देउवा नेतृत्वको १४औँ महाधिवेशनबाट निर्वाचित वर्तमान केन्द्रीय कार्यसमितिको कार्यकाल मंसिर मसान्तमा समाप्त हुने भएकाले सो समयभित्रै महाधिवेशन सम्पन्न गर्नुपर्ने डा। कोइरालाको तर्क छ ।

महामन्त्रीद्वय गगन थापा र विश्वप्रकाश शर्माले पनि सकेसम्म मंसिरभित्र नियमित महाधिवेशन नभए विशेष महाधिवेशन गर्नुपर्ने पक्षमा आवाज उठाउँदै आएका छन् । उनीहरूकै पहलमा युवा नेता गुरुराज घिमिरेको नेतृत्वमा २ हजार ४ सय ८८ जना महाधिवेशन प्रतिनिधिले विशेष महाधिवेशनको मागसहित कार्यवाहक सभापति पूर्णबहादुर खड्कालाई ज्ञापनपत्र बुझाएका थिए ।