खोज

काठमान्डौ, १५ कार्तिक ।

डोटीमा शिक्षिका जानकी खड्का मृत्यु प्रकरणमा शुक्रवारका लागि तय गरिएको प्रतिवादीको बयान प्रक्रिया सरकारी वकिल अनुपस्थित रहँदा रोकिएको छ । जिल्ला प्रहरी कार्यालय डोटीका अनुसार वकिल जिल्लाबाहिर रहेकाले बयान अब कार्तिक १७ गतेसम्मका लागि सारिएको हो ।

प्रहरी निरीक्षक रामचन्द्र जोशीले शुक्रबारदेखि प्रतिवादीको बयान लिने तयारी गरिएको भए पनि वकिल उपस्थित नहुँदा प्रक्रिया अघि बढ्न नसकेको जानकारी दिए । उनले भने, “हिजो बयान लिने भनिएको थियो, तर सरकारी वकिल नभएकाले सम्भव भएन । अहिले प्रहरीको तर्फबाट आवश्यक तयारी भइरहेको छ। वकिल फर्किएपछि बयान प्रक्रिया अघि बढाइनेछ ।”

गत कात्तिक १० गते पूर्वीचौकी गाउँपालिका–१ निवासी २७ वर्षीया शिक्षिका जानकी खड्का घर नजिकैको रुखमा झुन्डिएको अवस्थामा मृत फेला परेकी थिइन् । बाजुराको बुढीगंगा नगरपालिका–५ स्थित भानोदय माध्यमिक विद्यालयमा गणित शिक्षिका रहेकी जानकी कैलाली बहुमुखी क्याम्पसमा स्नातकोत्तर तहको चौथो सेमेस्टरमा अध्ययनरत थिइन् ।

जानकीले मृत्युअघि लेखेको पत्रमा जिल्ला शिक्षा समन्वय इकाई डोटीका शिक्षा अधिकृत तथा विद्यालय निरीक्षक गणेशबहादुर रावलले आफूलाई विवाहका लागि निरन्तर दबाब दिएको उल्लेख छ । रावलले सामाजिक सञ्जालमार्फत मित्रता गाँसेर निरन्तर मानसिक तनाव दिएको पनि पत्रमा खुलाइएको छ ।

पत्रअनुसार विवाहको प्रस्ताव अस्वीकार गरेपछि रावलले जानकीका भाइ प्रदीपलाई फोन गरी “तिम्री दिदीले मसँग विवाह नगरे मारिदिन्छु” भन्दै धम्की दिएका थिए, जसले जानकीमा थप भय उत्पन्न गरेको देखिन्छ ।

घटनापछि मृतक परिवारको जाहेरीका आधारमा गणेशबहादुर रावललाई प्रहरीले पक्राउ गरी हिरासतमा राखेको छ ।