खोज

नेपालगञ्ज, १४ कात्तिक ।

जेन–जी आन्दोलनका क्रममा भएको भौतिक तथा मानवीय क्षतिको यथार्थ पत्ता लगाउन गठित जाँचबुझ आयोगका सदस्य एवं प्रवक्ता विज्ञान राज शर्माले निष्पक्ष र निर्भिक रूपमा प्रतिवेदन तयार पारिने प्रतिबद्धता व्यक्त गरेका छन् ।
भदौ २३ र २४ गतेको आन्दोलनका क्रममा सार्वजनिक सम्पत्ति, सरकारी संरचना, निजी घर तथा व्यवसायमा भएको क्षतिको स्थलगत अध्ययन र सरोकारवालासँगको छलफलका क्रममा बाँके पुगेका शर्माले शुक्रवार नेपालगञ्जमा आयोजित कार्यक्रममा भने— “आयोग कुनै पक्षपातमा आधारित हुनेछैन, हामीले यथार्थ प्रमाणसहित प्रतिवेदन बुझाउनेछौँ ।” उनले स्पष्ट पार्दै थपे, “फौजदारी अपराधमा अनुसन्धान र कारबाही गर्ने अधिकार प्रहरीकै हो। आयोगले कसैलाई कारबाही गर्न होइन, घटनाको यथार्थ अवस्था सरकारलाई जानकारी गराउने उद्देश्य राखेको छ ।” शर्माका अनुसार आपराधिक घटनामा अनुसन्धान र अभियोजन गर्न कुनै रोकटोक छैन । उनले भने, “हामी सत्य तथ्य उजागर गर्ने प्रतिबद्धतामा अडिग छौँ । आयोगको प्रतिवेदन जनताको विश्वास जित्ने खालको हुनेछ ।”

कार्यक्रममा कोहलपुर नगरपालिकाका प्रमुख पूर्ण प्रसाद आचार्यले आन्दोलनका नाममा अराजक समूहहरूले सरकारी कार्यालयदेखि आफ्नै निजी घरमा समेत तोडफोड र आगजनी गरेको उल्लेख गर्दै त्यसलाई गम्भीर अपराधका रूपमा लिनुपर्ने धारणा राखे । उनले भने, “उद्दण्डता मच्चाउनेहरूलाई कुनै पनि बहानामा उन्मुक्ति दिनुहुँदैन ।”

त्यस्तै, नेपालगञ्ज उपमहानगरपालिकाका प्रमुख प्रशासकीय अधिकृत रामहरि शर्माले आगजनी र लुटपाटमा संलग्नहरूको पहिचान गरी कानुनी दायरामा ल्याउन आग्रह गरे । कार्यक्रमका सहभागीहरूले विगतका आयोगका प्रतिवेदन कार्यान्वयन नभएकाले यस पटक पनि त्यस्तै हुने आशङ्का व्यक्त गर्दै यस आयोग र सरकारले गम्भीर प्रतिबद्धता देखाउनुपर्ने माग गरे । कार्यक्रममा नेकपा एमाले लुम्बिनी प्रदेशका सदस्य घननाथ खनाल, नेपाली काँग्रेस बाँकेका सचिव सुधांशु कोइराला, जिल्ला समन्वय समिति संयोजक ज्ञानेन्द्र कुमार चौधरी, प्रहरी प्रमुख एसपी अङ्गुर जिसी, पत्रकार महासङ्घ बाँके अध्यक्ष नवीन गिरी, उच्च अदालत बार अध्यक्ष चित्र बहादुर शाही, इन्सेक लुम्बिनी संयोजक भोला महत, र उद्योग वाणिज्य सङ्घका पूर्व अध्यक्ष कृष्ण प्रसाद श्रेष्ठ लगायतले पनि आफ्ना धारणा राखेका थिए ।

सो क्रममा आगजनी र तोडफोडबाट प्रभावित सरकारी कार्यालयका प्रमुखहरूले आफ्ना कार्यालयमा पुगेको क्षति र अहिलेको सेवा प्रवाहको अवस्थाबारे विस्तृत जानकारी प्रस्तुत गरेका थिए ।