खोज

काठमान्डौ, १४ कात्तिक ।

नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले विगतमा पार्टी निर्माण र सुदृढीकरणमा योगदान पुर्‍याएका सबै नेता तथा कार्यकर्तालाई पुनः एमालेमै फर्किन आह्वान गरेका छन् ।

शुक्रबार सामाजिक सञ्जाल फेसबुकमार्फत सन्देश जारी गर्दै अध्यक्ष ओलीले जहाँ भए पनि आफ्नै घर—नेकपा एमालमा फर्किन आग्रह गरेका हुन् ।

उनले लेखेका छन्, “विगतमा नेकपा एमालेको निर्माण र यसलाई बलियो बनाउने यात्रामा सँगै हिँड्नु भएका सबै नेता–कार्यकर्तालाई हृदयदेखि आह्वान गर्न चाहन्छु । जहाँ हुनुहुन्छ, फर्किनुहोस् आफ्नै घर फर्किनुहोस्। यो घर तपाईंहरूको पसिना र रगतले बनेको हो ।”

अध्यक्ष ओलीले सबै कार्यकर्तालाई काँधमा काँध मिलाएर अघि बढ्नुपर्नेमा जोड दिँदै देशको स्वाधीनता, लोकतन्त्रको रक्षा र जनजीवनमा सुख, समृद्धि र आशाको ज्योति बाल्न सबै एकजुट हुनुपर्ने बताए ।

उनले थपे, “हामी एउटै परिवार हौं। हाम्रो लक्ष्य स्पष्ट छ—समृद्ध नेपाल, सुखी नेपाली । कोही अलमलमा नपर्नुहोस्, आउनुहोस्, आफ्नै घरमा फर्किनुहोस् । हाम्रो साझा सपना साकार पार्न निर्णायक राष्ट्रिय शक्ति निर्माणमा जुटौं ।”

अध्यक्ष ओलीले देशको सार्वभौम अस्तित्वमाथि चुनौती उत्पन्न हुँदै गएको र लोकतान्त्रिक संविधानमाथि आक्रमण भइरहेका बेला मौन बस्नु नहुने उल्लेख गरे । उनका अनुसार, राष्ट्रिय एकता, स्वाभिमान र लोकतन्त्रको रक्षा आजको मूल कार्यभार बनेको छ ।

उनले नेकपा एमालेलाई एउटा साधारण राजनीतिक संगठन नभई जनताको रगत, पसिना, आँसु र आशाबाट बनेको विशाल परिवारका रूपमा परिभाषित गरे ।