खोज

कतार, १४ कात्तिक ।

कतारमा स्थापित सामाजिक संस्था प्युठान सेवा समाज कतारले गृह जिल्लामा एक विद्यालयलाई अक्षयकोष स्थापना गर्नको लागी आर्थिक रकम सहयोग गरेको छ ।

समाजले आफ्नो “१६ औ स्थापना दिवसको अवसर पारेर गृह जिल्लामा रहेका निम्न स्तरका विद्यालयलाई सहयोगार्थ ” गर्ने हेतुले आयोजना गरिएको कार्यक्रमबाट आएको मुनाफा रकम जिल्लाको झिम्रुक गाउँपालिका वडा न २ मा अवस्थित श्री बाल ज्योति प्राथमिक विद्यालयलाई अक्षयकोष स्थापनाको लागी रु  ५१,१५१ हजार रुपैयाँ रकम सहयोग गरेको हो ।

झिम्रुरुक गाउँपालिका वडा नं २ का वडा अध्यक्ष कृष्ण पोखरेल, विद्यालय व्यवस्थापन समितिका अध्यक्ष गीता महतारा, समाजका पूर्व कोषाध्यक्ष नवराज केसीको उपस्थितिमा एक कार्यक्रमका बिच समाजका महासचिव टङ्क प्रसाद पोखरेलले प्रधानाध्यापक तेजकला चुदालीलाई उक्त रकम हस्तान्तरण गरेको समाजले बुटवल टुँडेलाई जानकारी दिएको छ।

विद्यालयमा अक्षयकोषदातालाई भव्य स्वागत एवम् सम्मान समेत गरिएको थियो । अक्षयकोषले विद्यालयको शैक्षिक गुणस्तर वृद्धि गर्नका लागि उल्लेखनीय भूमिका निर्वाह गर्नुका साथै गरिब तथा जेहेन्दार विद्यार्थीको उज्ज्वल भविष्यका लागि उक्त अक्षयकोष उपयोग गरिने प्रधानाध्यापक चुदालीको भनाई रहेको छ ।

वडा अध्यक्ष पोखरेलले अक्षयकोष स्थापनाले विद्यालयमा अध्ययनरत गरिब तथा जेहेन्दार विद्यार्थीको पठनपाठनमा थप सहयोग पुग्ने बताउछन।

विद्यालयको शैक्षिक गुणस्तरमा सुधार ल्याउन कतारमा सामाजिक कर्म गरेर सहयोग पुर्‍याउने प्युठान समाज कतार प्रति हार्दिक आभार व्यक्त गरेका छन् । समाजले स्थापना काल देखि नै गृह जिल्ला प्युठान तथा कतारमा निरन्तर सामाजिक कार्य गर्दै आइरहेको छ ।