खोज

सल्यान, १४ कार्तिक ।

गत असोज १२ गतेदेखि दर्ता तथा अद्यावधिक सुरु भएकोमा सल्यानमा हालसम्म चार सय ३१ बढी नागरिकले मतदाता नामावलीमा आफ्नो नाम दर्ता गराएका छन् ।

जिल्ला निर्वाचन कार्यालयका अनुसार असोज देखि बिहीबार दिउँसो ४ः०० बजेसम्म ४३१ जना नयाँ मतदाता थपिएको र ९४ जनाले नामावली अद्यावधिक गरेका हुन् ।

जिल्ला निर्वाचन कार्यालयका प्रमुख धिरेन्द्र भण्डारीका अनुसार यो अवधिमा ६३ जनाले नामसारी गरेका छन् भने ३१ जनाले मतदाता नामावलीमा रहेको त्रुटि सच्याएका छन् ।

“नामावलीमा नाम दर्ता गर्ने अधिकांश जिल्ला प्रशासन कार्यालयबाट नागरिकता प्राप्त गरेका १६ देखि २२ वर्ष उमेर समूहका रहनुभएको छ, कतिपय छुटेका अन्य नागरिक पनि हुनुहुन्छ“, भण्डारीले भने । यही कार्तिक ३० गतेसम्म नयाँ दर्ता एवं अद्यावधिक कार्य चल्ने कार्यालयले जनाएको छ ।

गत प्रतिनिधिसभा निर्वाचनमा सल्यानमा स्थायी मतदाता एक लाख ५७ हजार ७०१ जना र अस्थायी मतदाता दुई हजार ६६१ जना रहेका थिए । जसमा एक हजार दुई सय ६५ जना अस्थायी मतदाता र ८३ हजार ४७ जना स्थायी मतदाता गरेर जम्मा ८४ हजार तीन सय १२ जनाले मत खसेको जिल्ला निर्वाचन कार्यालयका सूचना अधिकारी तेजेन्द्रकुमार चन्दले जनाए ।

मतदाता नामावलीमा नयाँ नाम दर्ता र अद्यावधिक बारे जिल्लाका विभिन्न कार्यक्रमको अवसरमा र सञ्चार माध्यम, अन्य माध्यमबाट पनि प्रचारप्रसार कार्य चलिरहेको जिल्ला निर्वाचन कार्यालयले जनाएको छ ।