खोज

काठमाडौं, १३ कात्तिक ।

नेपाल प्रहरीमा ६ वरिष्ठ उपरीक्षक (एसएसपी)को दरबन्दी हाल रिक्त रहेको छ ।

भुपेन्द्र खत्री, सानुराम भट्टराई, ओम अधिकारी, शेखर खनाल र अबिनारायण काफ्ले डीआईजीमा बढुवाका लागि सिफारिस भएपछि ५ एसएसपी रिक्त भएका थिए ।

बुधबार मात्र सुदूरपश्चिम प्रदेश प्रहरी कार्यालयमा कार्यरत अर्का एसएसपी प्रकाश रानाभाटले राजीनामा दिएपछि रिक्त एसएसपीको संख्या ६ पुगेको छ । रिक्त पदमा बढुवा सिफारिसका लागि समितिले गृहकार्य सुरु गरेको छ ।

हाल बढुवा सिफारिस भएका डीआईजीहरू बढुवा भएर दर्ज्यानी चिह्न लगाइसकेका छन् । रानाभाटको राजीनामा स्वीकृत भएपछि एसएसपीमा बढुवा गर्ने तयारी अघि बढाइएको छ ।

बढुवा सूचीको पहिलो नम्बरमा बिमल बस्नेत छन् । उनी २०५३ सालमा राष्ट्रिय अनुसन्धान विभागमा भर्ना भइ प्रहरीमा स्थानान्तरण भएका अधिकृत हुन् । बस्नेत यसअघि पनि पटकपटक बढुवामा छुटेका थिए ।

पछिल्लो पटक गत साउनमा भएको बढुवामा छुटेपछि बस्नेतले बढुवा सिफारिसविरुद्ध उजुरी दिएका थिए । प्रहरी नियमावली २०७१ अनुसार बढुवा सिफारिसको सूचना सार्वजनिक भएको मितिले ७ दिनभित्र उजुरी गर्न सकिने व्यवस्था छ ।

५ साउनमा बढुवा सिफारिस समितिले ११ जना एसपीलाई बढुवाका लागि सिफारिस गर्दा बस्नेत छुटेका थिए ।

त्यतिबेला तुलबहादुर कार्की, राकेश सिंह, राजीवबहादुर बस्नेत, कमल थापा, प्रवीण धिताल, प्रकाश रानाभाट, ज्ञानेन्द्रप्रसाद फुयाल, दीपक पोखरेल, दयानिधि ज्ञवाली, दीपेन्द्र शाही र केदार खनाल बढुवाका लागि सिफारिस भएका थिए ।

आफूभन्दा ५ वर्ष जुनियर बढुवा हुँदा पनि छुटाइएको आरोप बस्नेतले लगाएका छन् । बस्नेत यसअघि कर्णाली प्रदेशको ट्राफिक प्रमुख हुँदा आर्थिक अनियमिततामा मुछिएका थिए, त्यसपछि एक वर्ष बढुवा रोक्का गरिएको थियो । रोक्काको अवधि सकिए पनि उनी पटकपटक बढुवामा छुटेका आरोपमा छन् ।

बस्नेतले दिएको उजुरीमाथि छानबिन भइसकेको छ । उजुरीअनुसार बढुवा सिफारिसमा तलमाथि भएन, जसले कार्यसम्पादन मूल्यांकनको अंकबाट २ अंक घट्ने निश्चित गरेको छ । नियमावलीअनुसार उजुरी पुष्टि नभए पनि पहिलो पटक उजुरी गर्नेको २ अंक र दोस्रो पटकदेखि ३ अंक काटिने व्यवस्था छ ।

यसअनुसार बस्नेतको २ अंक काटिएको छ । २ अंक कट्ने भएकाले उनी यस पटक बढुवामा पर्छन् वा पर्दैनन् भन्ने प्रश्न पेचिलो बनेको छ ।

बढुवा सूचीमा दोस्रो नम्बरमा रामप्रकाश शाह प्रतिस्पर्धामा छन् । उनी पनि २०५५ सालमा राष्ट्रिय अनुसन्धान विभागमा भर्ना भइ प्रहरीमा स्थानान्तरण भएका अधिकृत हुन् ।

त्यसपछि २० माघ २०७७ मा एसपी भएका अन्य अधिकृतहरू बढुवाको प्रतिस्पर्धामा छन् । जसमा भुवनेश्वर तिवारी, ऋषिराम कँडेल, सुरेशप्रसाद काफ्ले, अमरेन्द्रबहादुर सिंह, श्याम सिंह चौधरी, नहकुल पोखरेल, पदमबहादुर विष्ट, सुवासचन्द्र बोहरा, वासुदेव खतिवडा, प्रजित केसी, राजकुमार सिलवाल, योगेन्द्रसिंह थापा, महेन्द्रकुमार श्रेष्ठ, दिलिप घिमिरे र वीरेन्द्रबहादुर शाही छन् ।

उनीहरूमध्ये ६ जना एसएसपी बन्नेछन्, बाँकी एसपीमै रहने छन् ।