खोज

काठमान्डौ, १३ कार्तिक ।

नेपाली राष्ट्रिय फुटबल टोलीका मुख्य प्रशिक्षक म्याट रसले पदबाट राजीनामा दिएका छन् । अखिल नेपाल फुटबल संघ (एन्फा)  का महासचिव किरण राईले रसले राजीनामा दिएको पुष्टि गर्दै भने, “मुख्य प्रशिक्षक म्याट रसले राजीनामा दिएका छन्, अब मलेसियाविरुद्धको खेलका लागि कार्यवाहक प्रशिक्षक तोक्ने तयारी भइरहेको छ ।”

अस्ट्रेलियन प्रशिक्षक रसले दुई साताअघि भियतनामविरुद्धको खेलपछि नै राजीनामा दिएको बुझिएको छ । नेपालले एएफसी एसियन कप छनोटअन्तर्गत मंसिर २ गते मलेसियासँग पाँचौँ खेल खेल्ने तयारीमा छ ।

तर, मुख्य प्रशिक्षकले खेलअघि नै पद छाडेपछि अब एन्फाले कार्यवाहक प्रशिक्षकको नेतृत्वमा टोली उतार्ने भएको छ । सो खेल घरेलु मैदानमा हुनुपर्ने भए पनि दशरथ रंगशालाले अन्तर्राष्ट्रिय मान्यता नपाउँदा खेल मलेसियामै खेलिन लागेको हो ।

रसको नेतृत्वमा नेपालले एसियन कप छनोटका चारै खेलमा पराजय बेहोरेको थियो । नेपालले मलेसिया र लाओससँग एक–एक तथा भियतनामसँग दुवै खेलमा हार खेलेसँगै छनोट चरणमै यात्राको अन्त्य भएको हो ।

गत फागुनमा नियुक्त रसको कार्यकालमा नेपालले जम्मा सात खेल खेलेको थियो । तीमध्ये नेपालले सिंगापुरविरुद्ध एक जित, दुई बराबरी र चार हार दर्ता गरेको थियो । सिंगापुरमाथिको जित नै रसको नेतृत्वमा प्राप्त एक मात्र उपलब्धि मानिएको छ ।

४७ वर्षीय रस युइएफए प्रो लाइसेन्स प्राप्त प्रशिक्षक हुन् । उनी सन् २०२० मा दक्षिण कोरियाको महिला राष्ट्रिय टोलीका सहायक प्रशिक्षक रहँदा टोलीले २०२२ को एएफसी महिला एसियन कपको फाइनलसम्मको यात्रा तय गरेको थियो । फाइनलमा कोरियाले चीनसँग ३–२ को हार व्यहोरेको थियो ।

कोरिया पुग्नुअघि रसले चीनको यू–१५ महिला टोलीका प्रमुख प्रशिक्षकको रूपमा काम गरेका थिए । त्यसअघि उनी जर्मन क्लब फ्रान्कफर्टको महिला टोलीमा भिडियो विश्लेषकका रूपमा चार वर्ष कार्यरत थिए । त्यही अवधिमा फ्रान्कफर्टले सन् २०१५ को महिला च्याम्पियन्स लिग उपाधि जितेको थियो ।

युइएफए लाइसेन्स प्राप्त गरेपछि उनले फ्रान्कफर्टकै प्रशिक्षकका रूपमा दुई वर्ष काम गरे र त्यसपछि स्विडेनको शीर्ष डिभिजन क्लब भिट्जोको मुख्य प्रशिक्षक बने । स्विडेनबाट उनी चीन, कोरिया हुँदै पछिल्लोपटक संयुक्त अरब इमिरेट्स (युएई)  को युनाइटेड एफसी मा सहायक प्रशिक्षकका रूपमा कार्यरत थिए ।

प्रशिक्षक बन्नका लागि ४०५ जनाको आवेदनबाट रस छनोट हुन सफल भएका थिए ।