खोज

बुटवल, १३ कात्तिक ।

नेपाल नर्सिङ संघको आह्वानमा देशभरका नर्सहरूले समान मागसहित एकीकृत आन्दोलन सुरु गरेपछि लुम्बिनी प्रादेशिक अस्पतालमा कार्यरत नर्सहरुले पनि आन्दोलनलाई जारी राखेका छन् । बुटवलस्थित लुम्बिनी प्रादेशिक अस्पतालका नर्सहरूले सोमबारदेखि सुरु गरेको धर्ना बिहीबार पनि जारी छ ।

नेपाल नर्सिङ संघ लुम्बिनी प्रादेशिक अस्पताल इकाइ समितिको नेतृत्वमा सुरु गरिएको आन्दोलन अन्तर्गत नर्सहरूले अस्पताल प्राङ्गणमै धर्ना दिइरहेका छन् । उनीहरूले हातमा ‘नर्सिङ पेशाको सम्मान गर’, ‘जोखिम भत्ता लागू गर’, ‘हाम्रो श्रमको मूल्य देऊ’ भन्ने जस्ता नारासहित प्लेकार्ड बोकेर आफ्नो असन्तुष्टि प्रकट गरेका छन् ।

नर्सहरूले तलब वृद्धि, सुरक्षित कार्य वातावरण, पेशागत सम्मान र स्थायी नियुक्तिसहितका माग अघि सारेका छन् । आन्दोलनरत नर्सहरूले स्वास्थ्य सेवाको मूल आधार मानिने नर्सिङ पेसालाई सरकारले उपेक्षा गरेको भन्दै तत्काल माग सम्बोधन गर्न आग्रह गरेका छन् ।

“बेवास्ता भएपछि आन्दोलनमा उत्रन बाध्य भयौं”

नेपाल नर्सिङ संघ लुम्बिनी प्रादेशिक अस्पताल इकाई समितिकी सचिव तथा प्रवक्ता सीता खनालले नर्सहरूको समस्या समाधानका लागि पटक–पटक ज्ञापनपत्र बुझाइए पनि सम्बन्धित निकायले गम्भीर ध्यान नदिँदा आन्दोलन अपरिहार्य बनेको बताइन् ।

उनले भनिन्, “हामीले शान्तिपूर्ण तरिकाले मागहरू राख्दै आएका थियौं। तर सरकार र प्रशासनले हाम्रो आवाज सुनेन। त्यसैले अब नर्सहरूको अस्तित्व र सम्मानका लागि सडकमा आउनु परेको छ ।”

खनालका अनुसार हाल कार्यरत नर्सहरूले महामारीको समयदेखि नै अत्यधिक कार्यभार र जोखिमपूर्ण वातावरणमा सेवा दिँदै आएका छन्, तर त्यसअनुसारको सुविधा, भत्ता र सम्मान पाएका छैनन् ।

यस्ता छन् नर्सहरूका मुख्य माग

नेपाल नर्सिङ संघले हालका आन्दोलनमा १५ बुँदे मागपत्र पेश गरेको छ, जसमा निम्न विषयहरू प्रमुख छन् —

१. तलब वृद्धि र समान सुविधा — संघीय, प्रादेशिक र स्थानीय तहमा कार्यरत नर्सहरूलाई समान तलब र सुविधा प्रदान गर्नुपर्ने ।
२. जोखिम भत्ता सुनिश्चितता — रात्री पालो, महामारी, आकस्मिक सेवा जस्ता उच्च जोखिमपूर्ण काममा संलग्न नर्सहरूलाई उचित जोखिम भत्ता दिनुपर्ने ।
३. पेशागत सम्मान र मर्यादा — नर्सहरूको पेशागत पहिचान, निर्णय प्रक्रियामा सहभागिता र सम्मानजनक व्यवहार सुनिश्चित गर्नुपर्ने ।
४. स्थायीकरण र करार नवीकरण — दीर्घकालीन रूपमा कार्यरत करार नर्सहरूलाई स्थायी नियुक्ति दिनु र करार नवीकरणमा पारदर्शिता कायम गर्नुपर्ने ।
५. समान अवसर र पदोन्नति नीति — तालिम, अध्ययन र पदोन्नतिका अवसरमा निष्पक्षता र समानता कायम गर्नुपर्ने ।
६. कानूनी सुरक्षा — कार्यस्थलमा हुने दुव्र्यवहार, हिंसा र भेदभावबाट नर्सहरूको कानूनी सुरक्षा सुनिश्चित गर्नुपर्ने ।
७. जनशक्ति व्यवस्थापन सुधार — अस्पतालमा बढ्दो बिरामी संख्याका अनुपातमा नर्सहरूको दरबन्दी वृद्धि गरी कार्यभार कम गर्नुपर्ने ।

संघका अनुसार यी मागहरू समेटिएको ज्ञापनपत्र स्वास्थ्य तथा जनसंख्या मन्त्रालय, लुम्बिनी प्रदेश सामाजिक विकास मन्त्रालय र सम्बन्धित निकायहरूलाई बुझाइएको छ ।

नर्सिङ पेशाको सम्मानका लागि देशव्यापी एकता

नेपाल नर्सिङ संघका केन्द्रीय पदाधिकारीहरूले देशभरका नर्सहरूलाई एकजुट भएर पेशागत अधिकारका लागि उभिन आह्वान गरेका छन् । संघका अनुसार आन्दोलनका क्रममा अत्यावश्यक सेवा भने निरन्तर प्रदान गरिनेछ ।

संघले भनेको छ, “नर्सहरू राष्ट्रका हरेक स्वास्थ्य संकटमा अग्रपंक्तिमा उभिएका छन्, तर उनीहरूको श्रमको मूल्य र सम्मान कहिल्यै पूरा हुन सकेको छैन। अब सरकारले तत्काल माग सम्बोधन गरी स्वास्थ्य सेवाको मेरुदण्ड बनेका नर्सहरूको मनोबल उच्च राख्नुपर्छ।”

बुटवलमा भइरहेको धर्नामा सहभागी नर्सहरूले सरकारले माग सम्बोधन नगरे आन्दोलन थप कडा बनाउने चेतावनी दिएका छन्। संघले आगामी दिनहरूमा चरणबद्ध रूपमा कार्यक्रम विस्तार गर्ने जनाएको छ।

नर्सहरूको आन्दोलन अहिले समान तलब, जोखिम भत्ता, पेशागत सम्मान, स्थायीकरण र कानूनी सुरक्षाका मागहरूमा केन्द्रित छ। उनीहरूले सरकारलाई तत्काल वार्तामा बस्न र मागहरू सम्बोधन गर्न आग्रह गरेका छन्, अन्यथा आन्दोलन देशव्यापी रूपमा थप सशक्त बनाइने चेतावनी दिएका छन्।