खोज

काठमान्डौ, १३ कार्तिक ।

पतञ्जलि योगपीठ र आयुर्वेद कम्पनी नेपालको जग्गा हिनामिना प्रकरणमा नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालसहितको भ्रष्टाचार मुद्दा विशेष अदालतमा आज सुनुवाइका लागि पेशी तोकिएको छ ।

विशेष अदालतका न्यायाधीश नारायणप्रसाद पौडेल र हेमन्त रावलको इजलासमा उक्त मुद्दाको सुनुवाइ हुनेछ ।

अख्तियार दुरुपयोग अनुसन्धान आयोगले पतञ्जलि जग्गा प्रकरणमा नेपालसहित ९३ जनालाई प्रतिवादी बनाउँदै गत जेठ २२ गते विशेष अदालतमा मुद्दा दायर गरेको थियो । अख्तियारले नेपालविरुद्ध १८ करोड ५८ लाख ५० हजार रुपैयाँ बराबरको बिगो, जरिवाना र सजाय मागदाबी गरेको छ ।

अख्तियारका अनुसार तत्कालीन प्रधानमन्त्रीको हैसियतमा नेपालले पदको दुरुपयोग गरी सरकारी सार्वजनिक सम्पत्ति व्यक्तिगत र संस्थागत स्वार्थमा हस्तान्तरण गरेको र सो क्रममा भ्रष्टाचारजन्य कार्यमा संलग्न भएको आरोप लागेको छ ।

नेपाल नेतृत्वको मन्त्रिपरिषद्ले २०६६ फागुन ६ गतेको बैठकबाट पतञ्जलिलाई कानुनले तोकेको हदबन्दीभन्दा बढी जग्गा खरिद–विक्रीको स्वीकृति प्रदान गरेको र २०६६ माघ १८ गते नेपालकै ठाडो आदेशमा सो जग्गा सट्टापट्टा र बिक्री गर्न अनुमति दिएको अभियोगपत्रमा उल्लेख छ ।

कुल ३१४ रोपनी १५ आना २ पैसा १ दाम जग्गा गैरकानुनी रूपमा बिक्री तथा हिनामिना भएको भन्दै अख्तियारले ९३ जना विरुद्ध मुद्दा दायर गरेको हो। आयोगले सो प्रकरणमा १८ करोड ५८ लाख ५० हजार रुपैयाँ बिगो मागदाबी गरेको छ ।