खोज

काठमाडौँ ।

बीपी राजमार्गको बाढी प्रभावित भागको पुनर्निर्माण तथा मर्मतसम्भारका लागि जापान सरकारले २ अर्ब ८० करोड जापानी येन (करिब २ अर्ब ६० करोड नेपाली रुपैयाँ) बराबरको अनुदान सहायता प्रदान गर्ने भएको छ ।

नेपाल सरकार र जापान सरकारबीच बीपी राजमार्गको पुनर्निर्माण तथा मर्मतसम्भारका लागि अनुदान सम्झौतामा हस्ताक्षर भएको हो । अर्थमन्त्री रामेश्वरप्रसाद खनाल र गृहमन्त्री ओम प्रकाश अर्यालको उपस्थितिमा आज अर्थ मन्त्रालयमा आयोजित समारोहमा हस्ताक्षर गरिएको थियो ।

महोत्तरीको बर्दिबासदेखि काभ्रेपलाञ्चोकको धुलीखेलसम्म १५९ किलोमिटर लम्बाइको बीपी राजमार्गको निर्माण जापान सरकारको अनुदान सहयोगमा गरिएको थियो ।

गत वर्षको विनाशकारी बाढी र पहिरोका कारण राजमार्गका विभिन्न खण्डहरू गम्भीर रूपमा क्षतिग्रस्त भएका थिए, विशेषगरी रोशी नदी आसपासका भागहरू पूर्ण रूपमा नष्ट भएका थिए ।

क्षतिग्रस्त खण्डको पुनर्निर्माण र मर्मतसम्भारका लागि जापान सरकारले नेपाल सरकारलाई २ अर्ब ८० करोड जापानी येन अनुदान सहायता प्रदान गरेको हो । अनुदान सहायतासम्बन्धी एक्स्चेन्ज अफ नोट्समा नेपाल सरकारको तर्फबाट अर्थ सचिव घनश्याम उपाध्याय र जापानको तर्फबाट नेपालका लागि राजदूत तोรุ माएदाले हस्ताक्षर गरे ।

त्यस्तै, अनुदान सम्झौतामा नेपालतर्फ अर्थ मन्त्रालयको वैदेशिक सहायता समन्वय महाशाखाका सहसचिव धनीराम शर्मा र जापानतर्फ जाइका नेपालका प्रमुख प्रतिनिधि मित्सुजाकी मिजुकीले हस्ताक्षर गरे ।

हस्ताक्षर समारोहपछि अर्थमन्त्री खनालले जापानलाई नेपालका लागि विश्वसनीय र भरोसायोग्य विकास साझेदार भएको भन्दै आभार व्यक्त गरे । उनले हालको अनुदान नेपाल र जापानबीचको मित्रता र सहकार्यको अर्को महत्वपूर्ण प्रतीक भएको पनि बताए ।

जापानी राजदूत माएदाले अनुदान सहयोगले बीपी राजमार्गका क्षतिग्रस्त भागहरू पुनःस्थापना गर्न सहयोग पुग्ने विश्वास व्यक्त गर्दै, नेपाल र जापानबीचको दशकौं पुरानो मित्रतापूर्ण सम्बन्ध स्मरण गरे ।

हस्ताक्षर समारोहमा अर्थ मन्त्रालय, भौतिक पूर्वाधार तथा यातायात मन्त्रालय, काठमाडौंस्थित जापान दूतावास र जाइकाका वरिष्ठ अधिकारीहरू उपस्थित थिए ।