खोज

काठमान्डौ, १२ कार्तिक ।

जेनजी आन्दोलनका क्रममा भएको क्षतिपूर्तिका दाबीमा बीमा कम्पनीहरूले हालसम्म करिब पौने ३ अर्ब अग्रिम भुक्तानी गरेका छन् । बीमा प्राधिकरणले आन्दोलनमा क्षति भएका बिमितलाई दाबी रकमको ५० प्रतिशतसम्म अग्रिम भुक्तानी गर्न निर्देशन दिएपछि बीमकहरूले सो रकम वितरण गरेका हुन् ।

२०७८ साल भदौ २३ र २४ गते भएको जेनजी आन्दोलनका क्रममा आगजनी र तोडफोडका कारण व्यवसाय, उद्योग र सवारीसाधनमा ठूलो क्षति पुगेको थियो । त्यसको क्षतिपूर्तिका लागि दाबी परेको रकमको आधासम्म अग्रिम भुक्तानी दिन सरकारले प्राधिकरणलाई निर्देशन दिएको थियो ।

सरकारको सो निर्देशनपछि प्राधिकरणले बीमा कम्पनीहरूलाई मूल्यांकन प्रक्रियासँगै बिमितलाई सहज बनाउन अग्रिम भुक्तानी गर्न आदेश दिएको थियो । सोही अनुसार कम्पनीहरूले हालसम्म २ अर्ब ७९ करोड ७४ लाख रुपैयाँ अग्रिम रूपमा वितरण गरेका छन् ।

तर प्राधिकरणका अनुसार हालसम्म २३ अर्ब २३ करोड ३७ लाख रुपैयाँ बराबरको क्षतिपूर्ति दाबी परेको छ । यी दाबीमध्ये अग्रिम भुक्तानी १५ बीमा कम्पनीले मात्र गरेका छन् । सञ्चालनमा रहेका १८ निर्जीवन बीमा कम्पनीहरूमा जम्मा ३ हजार १ सय ८७ बिमितले दाबी दर्ता गराएका छन् । राष्ट्रिय बीमा कम्पनी, नेसनल इन्स्योरेन्स कम्पनी र स्टार माइक्रो इन्स्योरेन्स कम्पनीले भने हालसम्म कुनै अग्रिम भुक्तानी गरेका छैनन् ।

सबैभन्दा बढी अग्रिम भुक्तानी सिद्धार्थ प्रिमियर इन्स्योरेन्सले गरेको छ — उक्त कम्पनीले १ अर्ब २८ करोड रुपैयाँ भुक्तानी गरेको प्राधिकरणले जनाएको छ । सो कम्पनीमा ५ अर्ब ४९ करोड रुपैयाँ बराबरको दाबी परेको छ ।

त्यस्तै, द ओरिएन्टल इन्स्योरेन्स कम्पनीमा ५ अर्ब २४ करोड रुपैयाँ बराबरको दाबी परेकोमा अग्रिम भुक्तानी १ करोड ६६ लाख रुपैयाँ मात्र गरिएको छ ।
बीमा शीर्षकअनुसार, हालसम्म दाबी परेको सम्पत्तिमध्ये ६७३ वटा सम्पत्ति बीमा, २ हजार २७० मोटर बीमा, १ सय ९२ इन्जिनियरिङ तथा ठेकेदार बीमा, १२ परिवहन बीमा र ४० अन्य बीमा गरी जम्मा ३ हजार १८७ दाबी परेको प्राधिकरणले जनाएको छ ।

सबैभन्दा बढी दाबी सम्पत्ति बीमा शीर्षकमा परेको छ — जसको कुल मूल्य करिब १९ अर्ब रुपैयाँभन्दा बढी रहेको छ । प्रदेशगत रूपमा हेर्दा, बागमती प्रदेशबाट सबैभन्दा बढी क्षतिपूर्तिको दाबी परेको छ ।

सो प्रदेशबाट मात्रै १७ अर्ब ६१ करोड रुपैयाँ बराबरको माग दाबी दर्ता भएको प्राधिकरणको विवरणमा उल्लेख छ ।