खोज

काठमान्डौ, ११ कार्तिक ।

११औँ राष्ट्रिय महाधिवेशनको तयारीमा रहेका नेकपा एमालेले आफ्नो केन्द्रीय सचिवालयको बैठक कात्तिक १५ गतेका लागि बोलाएको छ । बैठकले महाधिवेशनसँग सम्बन्धित विभिन्न तयारी र निर्णयहरू गर्ने पार्टीले जनाएको छ ।

पछिल्लो केन्द्रीय कमिटी बैठकले आगामी मंसिर २७ देखि २९ गतेसम्म पोखरामा ११औँ राष्ट्रिय महाधिवेशन गर्ने निर्णय गरेको थियो ।

एमाले केन्द्रीय कार्यालयका सचिव डा. भीष्म अधिकारीका अनुसार आगामी सचिवालय बैठकमा महाधिवेशन तयारीका एजेन्डामाथि विस्तृत छलफल हुनेछ ।

सो बैठकले महाधिवेशन प्रतिनिधि छनोट विधि,महाधिवेशन सम्पन्न गर्न विभिन्न उपसमिति गठन,स्थानीय आयोजकसँग समन्वय आदिका बारेमा निर्णय गर्ने सचिवालयका एक नेताले जानकारी दिएका छन् । ती नेताका अनुसार सो बैठकले महाधिवेशन तयारीको पूर्ण खाका सार्वजनिक गर्नेछ । बैठकले महाधिवेशनको लोगो र नाराका विषयमा पनि छलफल गर्नेछ ।

महाधिवेशन हुने पोखराका लागि पार्टीको गण्डकी प्रदेश कमिटी, कास्की जिल्ला कमिटी र पोखरा महानगर कमिटीले प्रारम्भिक तयारी सुरु गरिसकेका छन् ।

भदौ २४ गतेको विध्वंसमा च्यासलस्थित केन्द्रीय कार्यालय जलेपछि सोही ठाउँमा पाल टाँगेर अस्थायी कार्यालय सञ्चालन भइरहेको डा. अधिकारीले जानकारी दिए । उनका अनुसार दैनिक प्रशासनिक कामसँगै हाल महाधिवेशन केन्द्रित कार्यहरू पनि तीव्र रूपमा अघि बढाइएका छन् ।

एमालेमा हाल करिब ६ लाख ५० हजार पार्टी सदस्य रहेका छन् । पार्टी सदस्यसंख्या बढेकाले यस पटक महाधिवेशनका प्रतिनिधि संख्या पनि अघिल्ला वर्षभन्दा बढ्ने अनुमान गरिएको छ ।

दसौँ महाधिवेशनमा १८ सय प्रतिनिधि छनोट भएका थिए । सदस्यता वृद्धिसँगै ११औँ महाधिवेशनमा प्रतिनिधिको संख्या उल्लेख्य रूपमा बढ्न सक्ने नेताहरूको भनाइ छ ।