खोज

बुटवल।

लुम्बिनी प्रादेशिक अस्पताल बुटवलमा स्वास्थ्य बीमा कार्यक्रमअन्तर्गत सेवा लिनेहरूको संख्या तीव्र रूपमा बढेपछि फार्मेसी काउन्टर बिस्तार गरिएको छ । यसअघि दुईवटा काउन्टरबाट सेवा दिइँदै आएकोमा अहिले एकैपटक सातवटा काउन्टर सञ्चालनमा ल्याइएको अस्पतालले जनाएको छ ।

स्वास्थ्य बीमा कार्यक्रमका लागि सरकारले लुम्बिनी प्रादेशिक अस्पताललाई पहिलो प्रस्थान बिन्दु (फर्स्ट एन्काउन्टर पोइन्ट)को रूपमा मान्यता दिएको कारण सेवाग्राहीको चाप उल्लेख्य रूपमा बढेको हो । भीड व्यवस्थापन र छिटो सेवा वितरणका लागि काउन्टर बिस्तार गरिएको अस्पतालका मेडिकल सुपेरिन्टेन्डेन्ट डा. इन्द्र ढकालले जानकारी दिए ।
उनले भने, “फार्मेसी काउन्टरमा हुने लामो लाइन र भीड घटाउन सातवटा काउन्टर सञ्चालनमा ल्याइएको हो । यसले सेवाग्राहीलाई सहज र छिटो सेवा प्राप्त गर्न मद्दत पुर्‍याउनेछ ।”

अस्पतालका स्वास्थ्य बीमा शाखा प्रमुख दिपेन्द्र पौडेलका अनुसार बीमा कार्यक्रमअन्तर्गत दैनिक करिब १,२०० जना ओपीडी सेवाग्राही र करिब १०० जना आकस्मिक बिरामी सेवा लिन आउने गर्छन् । त्यस्तै, अस्पतालमा दैनिक ७० देखि ८० जना बिरामी भर्ना हुने गरेका छन् । फार्मेसी सेवाबाट मात्र दैनिक करिब १,५०० जना सेवाग्राही लाभान्वित हुने गरेको उनले बताए ।

गत आर्थिक वर्षमा अस्पतालमार्फत स्वास्थ्य बीमा कार्यक्रमअन्तर्गत करिब १ लाख ६० हजार जनाले सेवा लिएका थिए । सो अवधिमा अस्पतालले बीमा कार्यक्रममार्फत करिब ३५ करोड रुपैयाँ बराबरको उपचार सेवा उपलब्ध गराएको प्रमुख पौडेलले जानकारी दिए ।

फार्मेसी इन्चार्ज पदम खनालका अनुसार नयाँ सातवटा काउन्टर मंगलबारदेखि नै सञ्चालनमा आएका छन् । हालसम्म आठ जना कर्मचारीबाट सेवा दिइँदै आएकोमा काउन्टर विस्तारसँगै थप छ जना कर्मचारी परिचालन गर्ने तयारी भइरहेको उनले बताए ।
उनले भने, “अब सेवाग्राहीलाई लामो समय लाइनमा बस्नुपर्ने समस्या हट्नेछ । सेवा वितरण अझ व्यवस्थित र छरितो हुनेछ ।”

अस्पताल विकास समितिका अध्यक्ष अजयमान श्रेष्ठले सेवाको गुणस्तर र कार्यक्षमता सुधार गर्न निरन्तर प्रयास भइरहेको बताए । उनले भने, “फार्मेसी काउन्टर विस्तारले धेरै हदसम्म जनगुनासो कम गर्ने अपेक्षा गरिएको छ । नयाँ भवन निर्माण सम्पन्न नहुँदासम्म अस्थायी संरचना विस्तार गरेर भए पनि सेवा सहज बनाउने हाम्रो प्राथमिकता हो ।”

श्रेष्ठका अनुसार लुम्बिनी प्रादेशिक अस्पताल हाल लुम्बिनी प्रदेश सरकारको गौरव आयोजनाका रूपमा १२ तले अत्याधुनिक भवन निर्माणमा जुटिरहेको छ । उक्त भवनमा आधुनिक संरचना, उपकरण र दक्ष जनशक्ति व्यवस्थापनसहितको सेवा प्रणाली लागू गरिने तयारी भइरहेको उनले बताए ।