खोज

नेपालगञ्ज, ११ कात्तिक ।

आस्थाको उज्यालोले नेपालगञ्जको बागेश्वरी मन्दिर परिसर सोमवार झकिझकाउ बनेको छ । छठ पर्वको मुख्य दिन व्रतालुहरूले तलाउ किनारमा अस्ताउँदो सूर्यलाई अघ्र्य अर्पण गर्दै पूजा आराधनामा तल्लीन भए । हजारौं भक्तजनको उपस्थितिले बागेश्वरी मन्दिरको तलाउ क्षेत्र श्रद्धा र भक्ति दुवै रंगले रङ्गिएको देखिन्थ्यो ।

सूर्य देवताको उपासना गर्दै मनाइने यो पवित्र पर्वको आकर्षण नेपालगञ्जमा हरेक वर्ष झन् बढ्दो छ । यस वर्ष पनि बागेश्वरी मन्दिरभित्रको तलाउ क्षेत्रलाई ‘छठीघाट’का रूपमा मनमोहक सजावट गरिएको छ—रङ्गीन बत्ती, टेण्ट, बाजागाजा, भजनमण्डली र स्वच्छ घाटले सम्पूर्ण वातावरणलाई दिव्य र भक्तिमय बनाएको छ । स्थानीय प्रशासन, मन्दिर व्यवस्थापन समिति र भक्त समूहहरूले संयुक्त रूपमा सुरक्षा, सरसफाइ र व्यवस्थापनका सबै तयारी मिलाएका थिए । भक्तजनहरूको भीडले साँझपख बागेश्वरी परिसरलाई उत्सवमय बन्यो ।

 चारदिने यो महान् पर्वको समापन भोलि मंगलबार बिहान उदाउँदो सूर्यलाई अघ्र्य दिएपछि हुनेछ । पहिले पूर्वी तराईमा मात्र मनाइने यो पर्व अहिले पश्चिम नेपालका शहर र गाउँहरूसम्म फैलिएको छ । नेपालगञ्जमा बसोबास गर्ने मधेशी समुदायसँगै अन्य जातजातिका श्रद्धालुहरूले पनि समान उत्साहका साथ छठ मनाउने परम्परा बढ्दै गएको छ ।

चार दिन सम्म विशेष विधिपूर्वक मनाइने छठ पर्वको पहिलो दिन ‘नहाय–खाय’ अर्थात् नुहाएर चोखो खानाले सुरुवात हुन्छ। दोस्रो दिन ‘खरना’मा प्रसादस्वरूप खिर ग्रहण गरिन्छ । तेस्रो दिन अस्ताउँदो सूर्यलाई र चौथो दिन बिहान उदाउँदो सूर्यलाई अघ्र्य दिई व्रत समापन गरिन्छ ।

बागेश्वरीको छठीघाटमा मंगलबार दिउँसोदेखि नै महिला व्रतालुहरू तलाउमा डुबुल्की मार्दै आत्मशुद्धि गरिरहेका देखिन्थे । परम्परागत पोशाकमा सजिएका उनीहरूले काँसका ढकिया, टोकरी र माटाका मानासँग सूर्यदेवको आराधना गरे । धूप–दीप, फूल–फल र भजनसंगीतको मधुर धुनले बागेश्वरी मन्दिर परिसर साँझभरि नै आस्थाको उज्यालोमा चम्किएको थियो । विशेषतः सोमबारकै दिन छठ परेकाले नियमित हुने महा आरतीमा आज भक्तजनहरूको असाधारण भीड देखियो ।