खोज

गुल्मी,१० कात्तिक । 

गत जेठको पहिलो हप्ताबाट बन्द भएको काली गण्डकी नदीमा जल यातायात (स्टिमर) सञ्चालनमा आएको छ  ।

शिला शालिग्राम काली गण्डकी जल यातायात प्रालिका अध्यक्ष डोलप्रसाद भट्टराईका अनुसार  वर्षा याममा नदीमा पानीको बहाव बढेका कारण बन्द भएको जल यातायात सञ्चालनमा आएको हो  । शनिबार भएको समितिको बैठकबाट जल यातायात सञ्चालन गर्ने निर्णय भएको उनले बताए ।

पहिले खचाखच अहिले सङ्कटमा

स्याङ्जाको आधि मुहान मिर्मी देखी सेती बेनी सम्मको ६ किलोमिटरको  काली गण्डकी नदीमा जल यातायात अहिले सङ्कटमा पर्न थालेको छ ।

पहिले खाद्यान्न र यात्रुहरू खचाखच बोक्ने  जल यातायात (स्टिमर) अहिले  मेला पर्वहरूमा मात्र सीमित भएको हो ।
गुल्मी खण्डको काली गण्डकी कोरिडोर र पर्वत खण्डको काली गण्डकी लोक मार्ग खुलेपछि अहिले कहिले मेला पर्व र धर्म कर्म गर्ने मान्छेहरू आउँछन् भनेर व्यवसायीहरू पर्खेर बस्नु बाहेकको विकल्प छैन ।

कहिलेकाहीँ भ्रमण आउँनेहरुले स्टिमर रिर्जव गरेर सेतिबेनी शिला शालिग्रामको दर्शन गर्न  आउने जाने गर्ने गरेता पनि नियमित रूपमा यात्रुहरूको अभावका कारण समस्या भएको भट्टराईले बताए ।

गुल्मी खण्ड ,स्याङ्जा र पर्वत खण्डमा जताततै मोटरबाटोहरुको पहुँच भएका कारणले पनि स्टिमर सञ्चालनमा प्रभाव परेको उनको भनाइ छ ।