सामग्री खोज्नुहोस्

काठमान्डौ, ९ कार्तिक ।

‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ मार्फत् राजसंस्था पुनर्स्थापनाको पक्षमा सक्रिय रहेका मेडिकल व्यवसायी दुर्गा प्रसाईंले आफू सुध्रिन तयार भएको बताएका छन् । उनले आवश्यक परे देश छोड्न पनि तयार रहेको स्पष्ट पारेका छन् ।

आइतबार काठमाडौंमा आयोजित पत्रकार सम्मेलनमा बोल्दै प्रसाईंले भने, “यदि तपाईंहरूले भन्नुभयो भने— ‘दुर्गा, तँ देश छोडेर जा, तेरो कारणले यो सबै बिग्रियो,’ म तयार छु । म जान्छु । मलाई लोभ छैन, केही चाहिँदैन ।”

सन् २०५७ सालदेखि नेकपा माओवादी हुँदै एमालेसम्मको राजनीतिक यात्राको स्मरण गर्दै उनले जानेर–नजानेर भएका गल्ती स्वीकार गर्दै अब देश हितका लागि सुधारिने प्रतिबद्धता जनाए ।
“ल, हिजो जे भयो—भयो । हामी बाटो बिर्सियौं, सबैले गल्ती ग¥र्यौं । अब त कम्तीमा देश जोगाउने बेला हो,” उनले भने, “नेपाल भुंग्रोमा गएको छ, त्यसलाई उठाएर न्यानो ठाउँमा लैजाऔं । मान्छेले न्यानोपन खोजिरहेको छ, त्यसका लागि सुध्रिनै पर्छ ।”

प्रसाईंले आफू ‘रेण्डम स्वभाव’को व्यक्ति भएको बताउँदै मुख्यधारका सञ्चारमाध्यमले कहिल्यै सकारात्मक समाचार नलेखेको गुनासो पनि गरे ।
“मेनस्ट्रिम मिडियाले मेरो राम्रो कहिल्यै लेखेन, सधैं नराम्रो लेख्यो,” उनले भने, “तपाईंहरूसँग लडेर यहाँसम्म आएको हुँ, जानेर होस् वा नजानेर, म यहाँ आएको नै हुँ ।”

गत चैत १५ गते राजसंस्था पुनर्स्थापनाको समर्थनमा प्रसाईंले काठमाडौंको तिनकुनेमा आयोजना गरेको प्रदर्शन हिंसात्मक बनेपछि उनी भारत भागेका थिए । त्यसपछि प्रहरीले उनलाई पक्राउ गरी नेपाल ल्याएको थियो । जिल्ला अदालतले पुर्पक्षका लागि थुनामा पठाए पनि उच्च अदालतले पछि जमानतमा रिहा गरेको थियो ।

हाल प्रसाईंले कात्तिक १५ पछि पुनः प्रदर्शन गर्ने घोषणा गरेका छन् । तर गृह मन्त्रालयले शान्ति–सुरक्षाको चिन्ता व्यक्त गर्दै प्रदर्शन नगर्न आग्रह गरेको र वार्ताका लागि उनलाई बोलाएको छ ।

गृह मन्त्रालयको सो आह्वानपछि पत्रकार सम्मेलनमा प्रसाईंले सरकारको कदमको स्वागत गर्दै भने, “वार्तामा बोलाएर जनताको आवाज सुन्न खोजिएको छ, यो सकारात्मक पहल हो ।”