खोज

नेपालगञ्ज, ८ कार्तिक ।

बाँकेमा खुकुरी प्रहारबाट एक युवा गम्भीर घाइते भएका छन् ।

खजुरा गाउँपालिका १ सैनिक गाउँमा गत बिहीबार राती तीन जना युवाको समूहले खुकुरी प्रहार गर्दा स्थानीय २८ वर्षीय आशिष मरसाँङ्र्गी मगर घाइते भएका हुन् । खुकुरी प्रहारबाट आशिषको टाउकोको ६ ठाउँमा, दुवै हात तथा खुट्टामा र ढाडमा गहिरो चोट लागेको प्रहरीले जनाएको छ ।

उनको हाल नेपालगञ्ज स्थित न्युरो अस्पतालमा उपचार भइरहेको जिल्ला प्रहरी कार्यालय बाँकेको प्रहरी प्रवक्ता प्रहरी नायब उपरीक्षक दिपक पातलीले जानकारी दिए । आक्रमण गर्ने युवाहरु प्रमोद थापा क्षेत्री र हेमन्त थापा क्षेत्रीको समूह पनि सैनिक गाउँ निवासी रहेको र घटना लगत्तै तीनै जना फरार रहेको प्रहरीको भनाई छ ।

प्रमोद र हेमन्त सहेदर दाजु भाइ रहेको र उनीहरूसँग आशिषको सामान्य विवाद भएको एक वर्षपछि अहिले ज्यान मार्ने उद्देश्यले आक्रमण गरेको आशिषको पारिवारका सदस्यले जनाएका छन् । भाइटिकाको दिन राती करिब १० बजेतिर स्कुटरमा सवार आशिषलाई ती युवाहरूले एक्कासि रोकेर खुकुरी प्रहार गरेर गम्भीर घाइते बनाएको परिवारले दाबी गरेका छन् ।

घटना लगत्तै परिवारका सदस्यले राधापुर प्रहरी चौकीमा जाहेरी दिइसकेको जनाएका छन् । घटनामा संलग्नको खोजी कार्य तथा घटनाबारे अनुसन्धान जारी राखेको जिल्ला प्रहरी कार्यालय बाँकेले जनाएको छ ।