खोज

काठमान्डौ, ५ कार्तिक ।

नेपाल नागरिक उड्डयन प्राधिकरणका महानिर्देशक प्रदीप अधिकारीमाथि सोमबार साँझ दुर्व्यवहार गरेको आरोपमा प्रहरीले तीन जनालाई पक्राउ गरेको छ ।

काठमाडौं उपत्यका अपराध अनुसन्धान कार्यालयको टोलीले पक्राउ पर्नेमा सर्लाही घरका ३४ वर्षीय हेम तामाङ, रामेछाप घरका ३० वर्षीय सिर्जन अधिकारी, र काभ्रे घरका ३७ वर्षीय कोकिल बहादुर शाही रहेको जानकारी दिएको छ । उनीहरूलाई गएराति र बुधबार बिहान पक्राउ गरिएको अपराध अनुसन्धान कार्यालयका एसपी तथा प्रवक्ता काजिकुमार आचार्यले बताए ।

उनीहरू तीन जनाले सोमबार राति साढे ५ बजेतिर ललितपुरको सातदोबाटोस्थित एन्फा कम्लेक्सको गेट अगाडि प्रदीप अधिकारीको गाडी रोकेर हातपातको प्रयास गरेका थिए ।

उनीहरूले प्रदीप अधिकारीको गाडी अगाडि स्कुटर रोकेको प्रहरीले जनाएको छ । पछि हल्ला भएपछि श्रीजन स्कुटर त्यहीँ छाडेर भागेका थिए ।

‘स्कुटर त्यहीँ छाडेर भागे। हामीले सिसिटिभी फुटेज र स्कुटरको मद्दतबाट उनीहरूको खोजी गर्‍यौं,’ प्रहरी स्रोतले भन्यो । प्रहरीका अनुसार उनीहरूले प्रदीप अधिकारीलाई आक्रमण गर्ने नियत नराखेको प्रारम्भिक बयान दिएका छन् । बरू उनीजस्तै हुलिया भएका अर्कै व्यक्तिको खोजी गरेको उनीहरूले बताएका छन्।

‘प्रदीप अधिकारीजस्तै अनुहार भएको मानिसमाथि आक्रमणको प्रयास गरेको भन्छन्। के हो वास्तविकता बुझ्दैछौं,’ स्रोतले भन्यो, ‘बेलुकीको समय भएकाले हुलिया झुक्किएको भन्ने प्रारम्भिक बयान दिएका छन् । उनीहरू पनि कसैले काम लगाएर गर्ने खालका हुन्। त्यही हुलियाका मानिसमाथि आक्रमण गर्ने योजना रहेको बुझिन्छ।’

उनीहरूमाथि प्रहरीले थप अनुसन्धान अघि बढाउने भएको छ । उनीहरूले बयानमा आफूहरू तीन जना मात्रै संलग्न रहेको बताएका छन् । सिसिटिभी फुटेजमा भने अरू व्यक्तिहरू पनि देखिएकाले अरूको पनि खोजी भइरहेको छ ।

‘तीन जना मात्रै हौं भनेका छन्। तर अरू पनि देखिएकाले खोजी गरिरहेका छौं। बाटोमा हिँडेकाहरू पनि हुन सक्छन्,’ स्रोतले भन्यो।