खोज

सल्यान, ०१ कात्तिक ।

सल्यानका किसानहरूले यस वर्षको धान भित्राउने कार्यलाई करिब अन्तिम चरणमा पु¥याएका छन् । हिजोआज किसानहरू धान काट्ने, झार्ने र भित्र्याउने काममा व्यस्त देखिन्छन् । नजिकै तिहार आएकाले पनि पाकिसकेको धान भित्राउने चटारो छ ।

शारदा नदी आसपासको क्षेत्र गरिज्युला, सांघार क्षेत्र, रेशमज्युला लगाएत त्रिवेणीको लुहामखोला, कुमाख गाउँपालिकाको मर्मखोला, वनगाड कुपिण्डे नगरपालिकाको संग्रहीज्युला, वनगाड खोला, कालीमाटी गाउँपालिकाको बबई नदी लगायतका खोलाको आसपासका खेतमा किसानहरू धान भित्राउन व्यस्त छन् ।

गत असार पहिलो सातासम्म रोपाइँ गरेका अधिकांश किसानहरूले धान काटेर भित्राइसकेका छन् भने अन्य क्षेत्रमा पनि ६० प्रतिशत बढी खेतको धान भित्राइसकेको अनुमान छ ।

जिल्ला कृषि विकास कार्यालय सल्यानका अनुसार सल्यानमा गत आर्थिक वर्ष ०८१/८२ मा छ हजार हेक्टर क्षेत्रफलमा २८ हजार ८७८ मेट्रिकटन धान उत्पादन भएको थियो । यद्यपि गत वर्षभन्दा यस वर्ष ०.४ प्रतिशत कम क्षेत्रफलमा धान खेती भएको जिल्ला कृषि विकास कार्यालय सल्यानका प्रमुख महेश आचार्यले जानकारी दिए ।

उनले भने, “विशेष गरी पश्चिम सल्यानको बनगाड क्षेत्रमा केही कम क्षेत्रमा धान रोपाइँ भयो । अन्य क्षेत्रमा त पानीको उपलब्धता राम्रो भएकाले समयमै रोपाइँ भएको थियो । उत्पादन पनि बढ्ने अपेक्षा छ ।”

किसानहरूले यस वर्ष हाइब्रिड धानका जातहरूसँगै राम धान, खुमल, हार्दिनाथ, सुख्खा धान लगायतका जात लगाएका थिए । कालीमाटी र कुमाख गाउँपालिकामा किसानले चैते धान पनि खेती गर्दै आएका छन् ।

पछिल्ला केही वर्षयता किसानहरूले धान रोप्न तथा भित्राउनका लागि कृषि यन्त्रहरूको प्रयोग गर्दै आएका छन् । जिल्लामा आर्थिक वर्ष ०८०/८१ मा छ हजार २९ हेक्टर क्षेत्रफलमा २८ हजार ५५९ मेट्रिकटन धान उत्पादन भएको थियो । कार्यालयका अनुसार आर्थिक वर्ष ०७९÷८० मा जिल्लामा सात हजार ६६ हेक्टर क्षेत्रफलमा धान खेती भएको थियो ।