खोज

समाचार सारांशमा

• ---

  सरकारले कीर्तिपुरस्थित त्रिभुवन विश्वविद्यालय (त्रिवि) परिसरमा अन्तर्राष्ट्रिय स्तरको क्रिकेट रंगशाला निर्माणको गुरुयोजना स्वीकृत गरेको छ ।

  

• सहरी विकास मन्त्रालयको प्रस्तावमा मन्त्रिपरिषद्ले यो निर्णय गरेको हो ।

• गुरुयोजना अनुसार रंगशाला निर्माणको कुल लागत करिब १० अर्ब रुपैयाँ हुने अनुमान ।

  ---

काठमाडौं, ३१ असोज ।

सरकारले त्रिभुवन विश्वविद्यालय (त्रिवि) परिसर कीर्तिपुरमा अन्तर्राष्ट्रिय स्तरको क्रिकेट रंगशाला निर्माण गर्ने गुरुयोजना स्वीकृत गरेको छ ।

मन्त्रिपरिषद्को बिहीबार बसेको बैठकले सहरी विकास मन्त्रालयको प्रस्तावमा उक्त रंगशालाको गुरुयोजना स्वीकृत गर्दै आयोजनालाई राष्ट्रिय प्राथमिकता प्राप्त आयोजनाका रूपमा निर्धारण गरेको हो ।

गुरुयोजना अनुसार रंगशाला निर्माण गर्न करिब १० अर्ब रुपैयाँ लागत लाग्ने अनुमान गरिएको छ ।

सहरी विकासमन्त्री कुलमान घिसिङले उक्त रंगशाला नेपालकै पहिलो अन्तर्राष्ट्रिय स्तरको क्रिकेट मैदान हुने उल्लेख गर्दै, अन्तर्राष्ट्रिय खेल तथा पर्यटन प्रवर्द्धनमा यसको योगदान उल्लेखनीय हुने बताए । त्यसैले गुरुयोजना स्वीकृत गर्दै यसलाई राष्ट्रिय प्राथमिकतामा राखिएको उनको भनाइ छ ।

उनले भने, “रंगशालाको विकास र आधुनिकीकरण नेपालका लागि रणनीतिक रूपमा महत्त्वपूर्ण छ । अन्तर्राष्ट्रिय प्रतियोगिता सञ्चालन गर्न सुविधा सम्पन्न रंगशाला आवश्यक भएकाले गुरुयोजना अनुसार स्रोत सुनिश्चित गरी निर्माण प्रक्रिया अगाडि बढाइने छ ।”

मन्त्री घिसिङका अनुसार, राष्ट्रिय प्राथमिकता प्राप्त आयोजना अन्तर्गत जग्गा व्यवस्थापन, वातावरणीय प्रभाव मूल्यांकन अन्तिम रूप दिने र दोस्रो चरणको निर्माणका लागि टेन्डर प्रक्रिया अघि बढाउन मन्त्रिपरिषद्ले स्वीकृति दिएको छ ।

केही दिनअघि रंगशालाको पहिलो चरणको निर्माण स्थलगत निरीक्षणमा पुगेका घिसिङले गुरुयोजना अनुसार भइरहेको कामलाई निरन्तरता दिँदै, बजेट अभाव हुन नदिने गरी दोस्रो चरणको कार्य अघि बढाइने बताएका थिए ।

यसबाहेक, त्रिवि र नेपाल क्रिकेट संघबीच रंगशालाको प्रयोगसम्बन्धी गरिएको जग्गा करार सम्झौताको म्याद आगामी वैशाख २०८३ मा समाप्त हुँदै छ ।

मन्त्रिपरिषद्ले आवश्यक कानुनी प्रक्रिया पुरा गरी गुरुयोजना कार्यान्वयनका लागि त्रिवि र युवा तथा खेलकुद मन्त्रालय तथा राष्ट्रिय खेलकुद परिषदबीच समझदारी गर्न निर्देशन दिएको छ ।

हाल रंगशालाको पहिलो चरणका संरचना निर्माणाधीन छन् । निर्माण कार्य आगामी १ मंसिरदेखि सुरु हुने नेपाल प्रिमियर लिग (एनपीएल) अघि सम्पन्न गर्ने लक्ष्यसहित तीव्र गतिमा काम भइरहेको छ ।