खोज

बाँके, ३० असोज ।

साधारण परिवारमा जन्मिएका सत्य नारायण चौधरी थारु आज थारु संगीत जगतका उदाउमान कलाकारका रूपमा चिनिएका छन् । बाल्यकालदेखि संघर्ष गरिरहे पनि उनको प्रतिभा, लगनशीलता र आत्मविश्वासले उनलाई थारु म्यूजिक भिडियोको चम्किलो नाम बनाएको छ ।

बर्दिया जिल्लामा जन्मिएका सत्य नारायणले गाउँको साधारण विद्यालयमा अध्ययन गर्दा सानै उमेरदेखि अभिनय र गीत–संगीतमा रुचि देखाएका थिए । विद्यालयका सांस्कृतिक कार्यक्रमहरूमा उनी सधैं अग्रपंक्तिमा थिए र गाउँलेहरूले उनलाई ‘कलाकार बन्ने केटा’ भनेर सम्बोधन गर्न थालेका थिए ।

तर थारु समाजमा कलाकारिता व्यवसायिक रूपमा प्रोत्साहित नहुँदा परिवार र समाजबाट प्रश्नहरू पनि उठ्ने गर्थे, “कलाकार बनेर पेट पालिन्छ र?” यस्तो प्रश्नले उनलाई कहिलेकाहीँ निरुत्साहित बनाउँथ्यो ।

उनको अभिनय यात्राको सुरुवात नेपाली चलचित्रबाट भयो । केही वर्षअघि साना भूमिकामा अभिनय गर्दै उनले अनुभव हासिल गरे । तर ठूलो पर्दामा निरन्तरता दिन अवसर कम मिलेको कारण उनले थारु म्यूजिक भिडियो क्षेत्रमा आफ्नो पाइला टेके ।

थारु भाषा र संस्कृतिलाई जोगाउने अभिप्रायले उनले यस क्षेत्रमा काम गर्न थाले । “थारु भाषामा गीत र भिडियोले हाम्रो पहिचान बोल्छ,” उनी भन्छन् । उनले नेपाली चलचित्र ‘दानवी’मा पनि अभिनय गरे, जुन दर्शकबाट सकारात्मक प्रतिक्रिया पायो ।

उनको पहिलो म्यूजिक भिडियो ‘रानी जी’ ले राम्रो चर्चा पायो । त्यसपछि ‘दिल कहे बार बार’, ‘लाल फुला फुलल साली’ जस्ता गीतहरूमा अभिनय गर्दै उनी चर्चित भए । मिस्टर नेपाल प्रतियोगितामा समेत भाग लिएका उनले आफ्नो अभिनय शैलीमा सरलता, प्राकृतिकपन र भावुकता देखाएका छन् ।

कलाकारिता बाहेक सत्य नारायण शिक्षक र व्यवसायी पनि हुन् । बाँकेको एक विद्यालयमा उनी शिक्षकका रूपमा कार्यरत छन् र होटेल व्यवसाय पनि सञ्चालन गर्छन् । उनले सधैं भनेका छन्, “जीवनमा कुनै पनि पेशा सानो हुँदैन, म इमानदारीका साथ हरेक काम गर्छु ।”

थारु संगीत र चलचित्र उद्योग तीव्र गतिमा विकास भइरहेको छ । सत्य नारायणले अभिनयबाट थारु समाजको संस्कृति, प्रेम र संघर्ष उजागर गरेका छन् । उनले थारु समुदायका युवालाई आफ्नो प्रतिभा देखाउन र अवसरहरू खोज्न प्रेरित गर्छन् ।

सत्य नारायणका लागि कलाकारिता केवल मनोरञ्जन होइन, समाजमा सकारात्मक सन्देश दिनेको माध्यम हो । उनी भविष्यमा आफ्नै निर्माणमा थारु चलचित्र बनाउने योजना बनाइरहेका छन् ।

उनको सफलताका कारण थारु समुदायमा नयाँ ऊर्जा र सम्भावना जागृत भएको छ । सत्य नारायणले देखाएका छन् कि मेहनत र दृढसंकल्पले साधारण परिवारबाट पनि कलाकारितामा ठूलो पहिचान बनाउन सकिन्छ ।