खोज

 काठमाडौं, २९ असोज ।

प्रधानमन्त्री सुशीला कार्कीले हमासको आक्रमणमा परेर ज्यान गुमाएका नेपाली युवा विपिन जोशीको त्याग र बहादुरीलाई राष्ट्रले कहिल्यै नबिर्सने बताएकी छन् ।

प्रधानमन्त्री कार्कीले बन्धकमुक्त हुने आशामा बितेका दुई वर्ष र सामूहिक प्रार्थनाबीच विपिनको मृत्युको खबरले आफू स्तब्ध बनेको उल्लेख गरेकी छन् ।

“यो हृदयविदारक समाचारले हामी सबैलाई गहिरो पीडा दिएको छ । म यस कठिन घडीमा उहाँप्रति हार्दिक श्रद्धाञ्जली अर्पण गर्दछु र शोकाकुल परिवारजन तथा आफन्तहरूमा गहिरो समवेदना व्यक्त गर्दछु,” प्रधानमन्त्री कार्कीले भनिन् ।

उनले विपिन जोशी केवल एक विद्यार्थी मात्र नभई ज्ञानको खोजीमा विदेशिएका हजारौँ नेपाली युवाको उज्ज्वल प्रतिनिधि भएको उल्लेख गरिन् ।“विपिन जोशी केवल एक विद्यार्थी मात्र हुनुहुन्नथ्यो; उहाँ ज्ञानको खोजीमा विदेशिनुभएका हजारौं नेपाली युवाको उज्ज्वल प्रतिनिधि हुनुहुन्थ्यो ।

उहाँको जीवन उत्साह, लगनशीलता र अरूलाई सहयोग गर्ने विनम्र स्वभावले भरिएको थियो,” प्रधानमन्त्रीले भनिन् । प्रधानमन्त्री कार्कीले विपिनको निधन अन्तर्राष्ट्रिय द्वन्द्वको अमानवीय सिकारको उदाहरण भएको बताउँदै नेपाल सधैं शान्तिको पक्षमा उभिएको राष्ट्र भएको स्मरण गराइन् ।

“सदा शान्तिप्रेमी नेपालको एक सुपुत्र अन्तर्राष्ट्रिय द्वन्द्वको अमानवीय सिकार बन्नुभएको छ,” उनले भनिन् ।

“उहाँको निधनको यो खबरले हाम्रा दुई वर्षका सम्पूर्ण आशा र सपनाहरूलाई छिन्नभिन्न पारेको छ,” प्रधानमन्त्री कार्कीले भनिन्, “उहाँको यो वीरतापूर्ण कार्य उहाँको जीवनको सबैभन्दा ठूलो विरासत हो, जसले उहाँलाई सधैं नेपाली गौरवको प्रतीकका रूपमा जीवित राख्नेछ ।”