खोज

काठमान्डौ, २८ असोज ।

नेपाल विद्युत् प्राधिकरणले ट्रंकलाइन र डेडिकेटेड फिडर शुल्क तिर्न बाँकी रहेका उद्योगहरूको लाइन काट्ने तयारी गरेको छ । प्राधिकरणले कात्तिक २ गतेसम्म अन्तिम म्याद तोकेर त्यसपछि बक्यौता नतिर्ने सबै उद्योगको लाइन काट्ने चेतावनी दिएको हो ।

प्राधिकरणका प्रवक्ता राजन ढकालका अनुसार अहिलेसम्म कुनै उद्योगले बक्यौता तिरेका छैनन् । केही उद्योगी छलफलका लागि आएका भए पनि भुक्तानी नगर्ने विकल्प नभएको उनले बताए ।

ऊर्जामन्त्री कुलमान घिसिङ र कार्यकारी निर्देशक मनोज सिलवालको सक्रियतामा बक्यौता उठाउने प्रक्रिया अघि बढाइएको हो । प्राधिकरण सञ्चालक समितिको निर्णयअनुसार डेडिकेटेड फिडर तथा ट्रंकलाइनको महसुल नतिर्ने उद्योगहरूको लाइन काट्ने तयारी भइरहेको प्रवक्ता ढकालले जानकारी दिए ।

२०७२ माघदेखि २०७५ वैशाखसम्म लोडसेडिङको समयमा उद्योगहरूलाई प्रिमियम शुल्कमा विद्युत् आपूर्ति गरिएको थियो । तर, उद्योगीहरूले टीओडी मिटरको अभाव भन्दै ती बिल तिर्न अस्वीकार गर्दै आएका छन् ।

प्राधिकरणका अनुसार उक्त अवधिको मात्रै करिब ६ अर्ब ४० करोड रुपैयाँभन्दा बढी बक्यौता उठ्न बाँकी छ, भने डेडिकेटेड र ट्रंकलाइनतर्फ कुल २३ अर्ब ४४ करोड रुपैयाँ असुल हुन बाँकी छ । सम्राट् र रोल्पा सिमेन्टले आंशिक भुक्तानी गर्ने इच्छा देखाए पनि अन्य उद्योग सम्पर्कमा आएका छैनन् ।

१० वर्षदेखि जारी विवाद समाधान नहुँदा प्राधिकरणको वित्तीय अवस्था कमजोर बनेको छ । अब कुनै बहानामा बक्यौता नतिर्ने उद्योगलाई विद्युत् आपूर्ति बन्द गरिने प्राधिकरणले स्पष्ट पारेको छ ।