खोज

 काठमाडौं, २८ असोज ।

हमासद्वारा मारिएका नेपाली युवा विपिन जोशीको हत्या झन्डै दुई वर्षअघि नै भएको पुष्टि भएको छ । इजरायली सैनिक अस्पतालमा गरिएको डीएनए परीक्षणको रिपोर्टअनुसार उनको मृत्यु सन् २०२३ को अन्त्यतिर नै भइसकेको देखिएको इजरायलस्थित नेपाली दूतावास स्रोतले  जानकारी दिएको छ ।

‘हमासले हस्तान्तरण गरेको शव विपिन जोशीकै भएको डीएनए परीक्षणबाट पुष्टि भएको छ । उनको मृत्यु प्राकृतिक नभई हत्या नै भएको रिपोर्ट प्राप्त भएको छ,’ स्रोतले भन्यो ।

विपिनको शव अन्तर्राष्ट्रिय रेडक्रस सोसाइटी  मार्फत सैनिक अस्पतालमा पुर्‍याएर डीएनए परीक्षण गरिएको थियो । हालसम्म यसबारे इजरायलस्थित नेपाली दूतावासले औपचारिक रूपमा केही जानकारी गराएको छैन । परराष्ट्र मन्त्रालयका अधिकारीहरूले समेत अहिलेसम्म औपचारिक जानकारी नपाएको जनाएका छन् ।

स्रोतका अनुसार, परराष्ट्र मन्त्रालयको कार्यभार समेत सम्हालिरहेकी प्रधानमन्त्री सुशीला कार्कीलाई औपचारिक जानकारी गराएपछि विपिन जोशीको डीएनए परीक्षण प्रतिवेदन सार्वजनिक गरिने तयारी भइरहेको छ ।

कञ्चनपुरका विपिन जोशी अध्ययनको सिलसिलामा इजरायल गएका थिए । गत अक्टोबर ७ मा हमासले इजरायलको किबुत्ज क्षेत्रमा आक्रमण गर्दा उनी अन्य नेपाली विद्यार्थीहरूसँगै थिए ।

उक्त हमलामा १० जना नेपाली विद्यार्थीको ज्यान गएको थियो भने विपिनलाई हमास लडाकुहरूले बन्धक बनाएर लगेका थिए । त्यसयता उनी बेपत्ता थिए । इजरायल र हमासबीच युद्धविराम भएपछि मात्रै मंगलबार इजरायली सेनाका अधिकारीहरूले विपिनको मृत्यु पुष्टि गर्दै औपचारिक जानकारी दिएका हुन् ।

बन्दीहरू मुक्त गर्ने क्रममा हमासले मंगलबार विहान विपिनको शव इजरायली पक्षलाई हस्तान्तरण गरेको हो ।