खोज

बुटवल, २७ असोज २७ ।

भदौ २४ गतेको जेनजी आन्दोलनका क्रममा सामाजिक सञ्जालमा ‘भाटभटेनी चोरी’ आरोपसहित भाइरल भएकी दाङकी इशु भट्टराईले आफू निर्दोष रहेको बताएकी छन् । हाल बुटवल दीपनगरमा बसोबास गर्दै आएकी इशुले घटनाबारे मिडियामार्फत सत्यता सार्वजनिक गर्दै माफी होइन, न्याय मागेकी छन् ।

उनका अनुसार, सो दिन आफू भाटभटेनीको बाटो हुँदै निवासतर्फ जाँदै गर्दा तोडफोड भइरहेको दृश्य हेर्न केही समय रोकिएकी थिइन् । त्यस क्रममा एक जनाले बाटोमै दुई बोत्तल लेमन स्प्राइट दिएका कारण ती बोत्तल लिएकी थिइन् । “अंकलले दिनुभयो, मैले समातें । पछि भाटभटेनी खुलेपछि गएर त्यसको पैसा पनि तिरेँ,” उनले बताइन् ।

तर सो दृश्य टिकटक र अन्य सामाजिक सञ्जालमा चोरीको आरोपसहित भाइरल भएपछि आफूलाई मानसिक रूपमा ठूलो आघात पुगेको उनले बताइन् । “म चोरी गर्न गएको थिइनँ, गलत बुझाइका कारण मेरो फोटो र भिडियो प्रयोग गरी आरोप लगाइयो,” इशुको भनाइ छ ।

निर्दोष रहेको स्पष्ट पार्दै उनले मिडियामार्फत सबैसँग आफ्नो फोटो र भिडियो हटाइदिन र शेयर नगर्न आग्रह गरेकी छन् । भट्टराईले यस विषयमा भाटभटेनी व्यवस्थापन र प्रहरी कार्यालयमा पनि जानकारी दिएकी छन् । उनले भनिन्, “म निर्दोष छु, कृपया मेरो मान–सम्मान र मानसिक अवस्था बुझिदिनुहोस् ।”