खोज

काठमान्डौ, २७ असोज ।

आगामी फागुनमा १९ जना राष्ट्रिय सभा सदस्यहरूको कार्यकाल सकिन लागेसँगै निर्वाचन आयोगले माघ ११ गते निर्वाचन गर्ने तयारी अघि बढाएको छ ।

राष्ट्रिय सभा अध्यक्ष नारायणप्रसाद दाहालले गत शुक्रबार निर्वाचन आयोगका आयुक्तहरूसँग छलफल गरेका थिए । सो क्रममा आयोगका आयुक्तहरूले माघ ११ गते निर्वाचन गर्ने प्रारम्भिक कार्यतालिका तय भइसकेको जानकारी गराएका थिए ।

प्रधानमन्त्री सुशीला कार्कीले पनि यही असोज २१ गते सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोगका पदाधिकारीहरूसँग छलफल गरेकी थिइन् । सो अवसरमा कार्यवाहक प्रमुख निर्वाचन आयुक्त रामप्रसाद भण्डारी, आयुक्त डा. जानकीदेवी तुलाधर र सगुन शमशेर जबरा सहभागी थिए ।

आइतबार प्रधानमन्त्री कार्की र राष्ट्रिय सभा अध्यक्ष दाहालबीच पुनः सिंहदरबारमै भेटवार्ता भएको छ । सो भेटमा राष्ट्रिय सभा निर्वाचनको तयारी र समयतालिका सम्बन्धी विषयमा विस्तृत छलफल भएको थियो ।

अध्यक्ष दाहालले प्रधानमन्त्रीलाई सम्बोधन गर्दै भने,“दुई दिनअघि मैले निर्वाचन आयुक्तहरूलाई बोलाएर छलफल गरेको थिएँ । आयोगले माघ ११ गते निर्वाचन गर्ने तयारी पूरा गरेको छ। अब सरकारले समन्वय गर्नुपर्छ भनेर सुझाव दिएका छन् ।”

संविधान र कानुनअनुसार, राष्ट्रिय सभा सदस्यहरूको कार्यकाल सकिनुभन्दा ३५ दिनअघि नयाँ निर्वाचन सम्पन्न गरिसक्नुपर्ने व्यवस्था छ । यस अनुसार आयोग माघ दोस्रो साताभित्र निर्वाचन सम्पन्न गर्न बाध्य छ ।

अध्यक्ष दाहालका अनुसार प्रधानमन्त्री कार्की राष्ट्रिय सभा निर्वाचन समयमै सम्पन्न गर्ने पक्षमा छिन् । उनले जेनजीको राजनीतिक सहभागिताबारे पनि चासो देखाएकी थिइन् ।

राष्ट्रिय सभा निर्वाचनमा स्थानीय तहका प्रमुख र उपप्रमुखहरू तथा प्रदेशसभा सदस्यहरू मतदाता हुने कानुनी व्यवस्था छ । दाहालका अनुसार, मतदाताको संरचनामा परिवर्तन गर्न दलहरूबीच सहमति आवश्यक छ । अध्यक्ष दाहालले सातै प्रदेशमा निर्वाचन सहज र सुरक्षाको दृष्टिले सम्भव रहेको जनाएका छन् ।

आगामी फागुन २० गते कार्यकाल सकिएर १९ जना सदस्य बिदा हुँदैछन् । तीमध्ये १८ पदका लागि निर्वाचन हुनेछ भने राष्ट्रपतिद्वारा मनोनीत सदस्य बामदेव गौतमको कार्यकाल पनि समाप्त हुँदैछ । नयाँ सदस्य राष्ट्रपतिबाट मनोनीत गरिनेछ ।

फागुनमा कार्यकाल सकिने सांसदहरूमा एमालेका ८, माओवादी केन्द्रका ७, एकीकृत समाजवादीका १, जनता समाजवादी पार्टी नेपालका १, लोकतान्त्रिक समाजवादी पार्टीका १ र राष्ट्रपतिद्वारा मनोनीत १ सदस्य रहेका छन् ।

एमालेबाट बिदा हुने सांसदहरू हुन् — इन्दिरा देवी गौतम, गोपाल भट्टराई, तुलसाकुमारी दाहाल, देवेन्द्र दाहाल, भगवती न्यौपाने, विमला घिमिरे, शारदा देवी भट्ट र सुमित्रा बीसी ।

माओवादी केन्द्रबाट गोपीबहादुर सार्की अछामी, गंगाकुमारी बेलवासे, जगप्रसाद शर्मा, तारामान स्वाँर, नारायणकाजी श्रेष्ठ, मायाप्रसाद शर्मा र राधेश्याम पासवान बिदा हुँदैछन् ।

त्यस्तै, एकीकृत समाजवादीका बेदुराम भुसाल, जनता समाजवादी पार्टी नेपालका मृगेन्द्रकुमार सिंह यादव र लोकतान्त्रिक समाजवादी पार्टीका शेखरकुमार सिंहको कार्यकाल पनि आगामी फागुनमा समाप्त हुनेछ ।