खोज

काठमाडौँ ।

अमेरिकी विवादित संस्था बारबरा फाउण्डेसनको भूमिकालाई लिएर नेपालमा विभिन्न आशंका र विवाद बढिरहेका बेला नेपाली राजनीतिका ठूला नेतादेखि पत्रकारसम्मको संलग्नता देखिएको छ। फाउण्डेसनसँग नेपाली कांग्रेसका महामन्त्री गगनकुमार थापा, नेकपा (एमाले)का सचिव योगेश भट्टराई, राष्ट्रिय स्वतन्त्र पार्टी (रास्वपा)का उपसभापति डा.स्वर्णिम वाग्ले, पत्रकार दिलभुषण पाठक लगायतका व्यक्तिहरूको सम्बन्ध रहेको खुलेको छ।

जेन–जी आन्दोलनमा बारबरा फाउण्डेसनको संलग्नता र त्यसपछिका घटनाक्रमले फाउण्डेसनमाथि थप प्रश्न उठाएका छन्। आन्दोलनपछि बनेको अन्तरिम मन्त्रिपरिषद्की प्रधानमन्त्री सुशीला कार्की पनि बारबरा फाउण्डेसनका विभिन्न कार्यक्रममा सहभागी भएकी दृश्यहरू भिडियो र तस्बिरमार्फत सार्वजनिक भएका छन्।

त्यस्तै, फाउण्डेसनसँग सम्बन्धित पत्रकार जगदीश खरेल हाल सञ्चार, सूचना तथा प्रविधिमन्त्री बनेका छन् भने कुलमान घिसिङ उर्जामन्त्री र रामेश्वर खनाल अर्थमन्त्री बनेका छन्। कांग्रेसका केन्द्रीय सदस्य डा.गोविन्द पोखरेल पनि फाउण्डेसनका सदस्य रहेको जनाइएको छ।

पत्रकार दिलभुषण पाठकले बारबरा फाउण्डेसनको “टलक सिरिज” कार्यक्रम बारम्बार सञ्चालन गर्दै आएका छन्। उनले जेन–जी आन्दोलन शुरु हुनुभन्दा दुई महिना अगाडि कांग्रेस सभापति शेरबहादुर देउवा र नेतृ डा.आरजु राणाका छोरा जयवीर देउवाको लगानी रहेको भन्दै होटल हिल्टनबारे आलोचनात्मक भिडियो सामग्री प्रसारण गरेका थिए। सोही भिडियोका कारण देउवा परिवारमाथि सार्वजनिक असन्तोष बढेको र आन्दोलनका क्रममा केही व्यक्तिले देउवा दम्पतीमाथि हमला गरी घाइते बनाएको आरोप लगाइएको छ।

सोही आन्दोलनका क्रममा नक्सालस्थित हिल्टन होटलमा आगजनी हुँदा पाँच अर्ब रुपैयाँभन्दा बढीको क्षति भएको बताइन्छ। त्यसपछि पत्रकार पाठकको भूमिकामाथि पनि प्रश्न उठाइएको छ।

त्यस्तै, कांग्रेसका महामन्त्री गगन थापाले पनि जेन–जी आन्दोलनका मागहरूलाई समर्थन जनाउँदै कांग्रेसभित्र नेतृत्व परिवर्तन र विशेष महाधिवेशनको पहल गरेका थिए। पार्टी सभापति देउवा अस्पतालमा उपचाररत रहँदा थापाले हस्ताक्षर अभियान थालेका थिए। उनी बारबरा फाउण्डेसनसँग जोडिएका बेला त्यसका कार्यक्रममा पनि सक्रिय सहभागी रहेको उल्लेख छ।

एमालेका सचिव योगेश भट्टराईले पनि त्यस अवधिमा पार्टीभित्र नेतृत्व परिवर्तनको माग अघि सारेका थिए। उनले तत्कालीन अध्यक्ष तथा प्रधानमन्त्री केपी शर्मा ओलीलाई हटाएर नयाँ नेतृत्व ल्याउनुपर्ने अभिव्यक्ति दिएका थिए।

रास्वपाका उपसभापति डा.स्वर्णिम वाग्ले पनि बारबरा फाउण्डेसनसँग निरन्तर सम्पर्कमा रहेका भिडियो र तस्बिरहरू सार्वजनिक भएका छन्। रिपोर्टअनुसार, उनी पार्टी सभापति रवि लामिछाने र कार्यवाहक सभापति डोलप्रसाद अर्याललाई हटाएर नेतृत्वमा आउन खोजिरहेका छन्।

सन् २०१७ नोभेम्बर २० मा बारबरा एडम्स टक सिरिजको पहिलो एपिसोडमा गगन थापा, योगेश भट्टराई, डा.स्वर्णिम वाग्ले र पूर्व सचिव कृष्ण ज्ञवाली सहभागी रहेका थिए भने कार्यक्रमको सञ्चालन पत्रकार दिलभुषण पाठकले गरेका थिए।

फाउण्डेसनका विभिन्न कार्यक्रममा सहभागी रहेका प्रमुख व्यक्तिहरूमध्ये हरिवंश आचार्य, मदनकृष्ण आचार्य, हरिबहादुर थापा, किरण नेपाल, रवि लामिछाने, केदारभक्त माथेमा, पूर्वराष्ट्रपति डा.रामवरण यादव, डा.भगवान कोइराला, पत्रकार टीकाराम यात्री, अनुराधा कोइराला लगायत पनि रहेका छन्। फाउण्डेसनका अध्यक्ष डा.सन्दुक रुइत हुन् भने मोहना अन्सारीसहितका व्यक्तिहरू सदस्य रहेका छन्।