खोज

बुटवल —

आर्थिक अनुसन्धान केन्द्र नेपालको आयोजनामा अर्थविद् मनिकर कार्कीद्वारा लिखित पुस्तक ‘अर्थ दृष्टि : अल्पविकासको अर्थराजनीति’ को दोस्रो संस्करणमाथि सोमबार बुटवलमा परिचर्चा तथा अन्तरक्रिया कार्यक्रम सम्पन्न भयो।

कार्यक्रमका प्रमुख अतिथि प्राध्यापक डा. बाबुराम ज्ञवालीले पुस्तकमा समावेश गरिएका विषयहरू सबै पाठकले सहज रूपमा बुझ्न सक्ने गरी प्रस्तुत गरिएको बताए। उनले देशको विकासका लागि निजी क्षेत्रको मनोबल सुदृढ गर्नु अनिवार्य शर्त भएको भन्दै नीति निर्माताहरूलाई पुस्तक अध्ययन गर्न सुझाव दिए।

विशिष्ट अतिथि तथा नेकपा (माओवादी केन्द्र) लुम्बिनी प्रदेश अध्यक्ष सुदर्शन बरालले नेपाली अर्थतन्त्रका चुनौतीहरू पहिचान गरी तिनको दीर्घकालीन समाधानका लागि आयातित होइन, मौलिक विचार र मोडेललाई व्यवहारमा लागू गर्नुपर्नेमा जोड दिए। उनले पुस्तकले नेपाली अर्थतन्त्रलाई अगाडि बढाउन सन्दर्भ सामग्रीका रूपमा योगदान पुर्‍याउने विश्वास व्यक्त गरे।

नेपाल चेम्बर अफ कमर्स लुम्बिनी प्रदेश अध्यक्ष टंकप्रसाद पोखरेलले राज्यले स्थानीय उद्यमीलाई स्वदेशमै लगानी गर्न सहज वातावरण नबनाउँदा युवा उद्यमशीलता कमजोर बनेको उल्लेख गरे। उनले कच्चा पदार्थ, जनशक्ति र नीतिगत अवरोधका कारण उद्योगहरू कठिनाइमा परेका र पुँजी पलायन बढ्दै गएको बताए।

त्यसैगरी वरिष्ठ पत्रकार डा. बालकृष्ण चापागाईंले पुस्तकले उठाएका प्रश्नहरू गहिरो विश्लेषण र बहसका माग गर्ने खालका रहेको बताए। नेपाल पत्रकार महासंघ रुपन्देहीका अध्यक्ष दिनेश पाण्डेले देशमा देखिएका सामाजिक, आर्थिक र राजनीतिक संकटको समाधान खोज्ने तथा निजी क्षेत्रलाई उत्साहित पार्ने गरी लेखकहरू प्रस्तुत हुनुपर्ने धारणा राखे।

कार्यक्रममा राजेन्द्र लम्साल, कृष्ण पाण्डे, सञ्जीव भण्डारी, गणेश घिमिरे र नवीन सुनुवारलगायतले लेखकलाई शुभकामना दिँदै आफ्नो विचार प्रस्तुत गरे।

कार्यक्रममा लेखक मनिकर कार्कीले दोस्रो संस्करण प्रकाशित गर्नुपर्ने आवश्यकता र पुस्तक लेखनका आफ्ना अनुभवहरू बाँडे। कार्यक्रममा आर्थिक अनुसन्धान केन्द्रका अध्यक्ष हुमराज भुसाल, कोषाध्यक्ष जीवन परियारलगायतले पनि आ–आफ्नो धारणा राखेका थिए ।