खोज

काठमान्डौ, २३ असोज ।

भौतिक पूर्वाधार तथा यातायातमन्त्री कुलमान घिसिङ नेतृत्वको टोलीले आज बाढी–पहिरोले क्षतिग्रस्त बीपी राजमार्गका विभिन्न खण्डको अनुगमन गरेको छ ।

बाढीले क्षति पुर्‍याएका राजमार्गको झन्डै चार किलोमिटर खण्डमा अस्थायी ‘डाइभर्सन’ बनाएर सडक सञ्चालनको तयारी भइरहेको अवस्थामा मन्त्री घिसिङ टोलीसहित अनुगमनमा पुगेको हो ।

कार्यक्रमको क्रममा मन्त्री घिसिङले सडक विभागका इञ्जिनियर र निर्माण व्यवसायीलाई यस सडकलाई जतिसक्दो चाँडो सञ्चालनमा ल्याउन जोड दिएका छन् । उक्त सडक वाग्मती, मधेश र कोशी प्रदेशका जिल्लाहरूलाई राजधानी काठमाडौंसँग जोड्ने ‘लाइफ लाइन’ भएका कारण सबै खण्डमा शीघ्र सुधार गरिनुपर्ने बताए ।

सडकको भकुण्डे–नेपालथोक खण्ड गत आर्थिक वर्षको बाढीबाट क्षतिग्रस्त भएको थियो । तत्कालीन अस्थायी डाइभर्सन हालैको बाढीले झन्डै चार किलोमिटर पुनः बगाएको छ ।

मन्त्री घिसिङको निजी सचिवालयका अनुसार गत वर्षको बाढीबाट क्षतिग्रस्त सडकको केही खण्डमा स्थायी रूपमा निर्माणका लागि ठेक्का लागिसकेको छ भने अन्य खण्डको ठेक्का प्रक्रिया अन्तिम चरणमा रहेको छ ।

त्यसैगरी अनुगमनको क्रममा निर्माणमा रहेका ठेक्का कार्यको गुणस्तर र समयमै सम्पन्न गर्न निर्माण टोलीलाई निर्देशन दिइएको थियो ।