खोज

रोल्पा, २३ असोज ।

रोल्पाका स्थानीय तहहरूको विकास बजेटको ठुलो हिस्सा असारमा खर्च हुने गरेको छ । सङ्घीय सरकार र प्रदेश सरकारले विकास बजेट असारमा खर्च गर्दा पारदर्शिता र आयोजनाको दिगोपनामा प्रश्न उठिरहेको वेला स्थानीय सकारहरू समेत यसबाट अछुतो रहन सकेका छैनन् । (हेर्नुहोस् तालिका)

जिल्लाको सुनिलस्मृती गाउँपालिकाले आर्थिक वर्ष २०८०/०८१ को असार महिनामा मात्रै ४ करोड १२ लाख ३८ हजार खर्च गरेको थियो । कुल पुँजीगत खर्च १२ करोड ७३ लाख ४७ हजार रहेको सो गाउँपालिकाले असारमा मात्रै ३२ प्रतिशत भन्दा बढी पुँजीगत खर्च गरेको थियो ।

सो गाउँपालिकाले प्रथम चौमासिक २ करोड १६ लाख २१ हजार पुँजीगत खर्च गर्दा दोस्रो चौमासिक पुँजीगत खर्च ३ करोड ४ लाख ४५ हजार रहेको थियो । तेस्रो चौमासिक पुँजीगत खर्च ७ करोड ५२ लाख ८० हजार रहेको थियो । सो गाउँपालिकाको अन्तिम चौमासिक पुँजीगत खर्च कुल पुँजीगत बजेटको ५९ प्रतिशत भन्दा बढी हो ।

जिल्लाको परिवर्तन गाउँपालिकाले असार महिनामा ३ करोड ८५ लाख पुँजीगत खर्च गरेको थियो । सो गाउँपालिकाको कुल वार्षिक पुँजीगत खर्च १० करोड १५ लाख ४५ हजार रहेकोमा असार महिनामा मात्रै ३५ प्रतिशत भन्दा बढी पुँजीगत खर्च गरेको थियो ।

सो गाउँपालिकाको पहिलो त्रैमासिक खर्च ५५ लाख रहेको थियो । यस्तै दोस्रो त्रैमासिक खर्च ८६ लाख ९१ हजार रहेको थियो । तेस्रो त्रैमासिक पुँजीगत खर्च १ करोड ३४ लाख ५५ हजार रहँदा अन्तिम त्रैमासिक पुँजीगत खर्च ३ करोड ५७ लाख रहेको थियो ।

जिल्लाको गङ्गादेव गाउँपालिकाले असार महिनामा ६ करोड ८६ लाख ७८ हजार पुँजीगत खर्च गरेको थियो । कुल वार्षिक पुँजीगत खर्च ८ करोड ६५ लाख ९० हजार रहेको सो गाउँपालिकाले असार महिनामा मात्रै ७९ प्रतिशत भन्दा बढी हो ।

उसको प्रथम चौमासिक पुँजीगत खर्च शून्य रहेको थियो । दोस्रो चौमासिक पुँजीगत खर्च ८१ लाख ९५ हजार गरेको सो गाउँपालिकाको अन्तिम चौमासिक पुँजीगत खर्च ७ करोड ८४ लाख ९४ हजार रहेको थियो ।

थवाङ गाउँपालिकाको आर्थिक वर्ष २०८०/०८१ मा कुल पुँजीगत खर्च ११ करोड ४७ लाख ३१ हजार रहेकोमा सो गाउँपालिकाले असार महिनामा मात्रै ६ करोड ७६ लाख ३९ हजार खर्च गरेको थियो । असार महिनामा खर्च भएको यो रकम कुल पुँजीगत खर्चको झण्डै ५९ प्रतिशत हो ।

सो गाउँपालिकाको प्रथम त्रैमासिक पुँजीगत खर्च शून्य रहेको थियो । दोस्रो त्रैमासिक पुँजीगत खर्च ९८ लाख ४४ हजार गरेको सो गाउँपालिकाले तेस्रो त्रैमासिक पुँजीगत खर्च ९९ लाख ८८ हजार गरेको थियो । सो गाउँपालिकाको चौथो त्रैमासिक खर्च ९ करोड ४८ लाख ९९ हजार रहेको थियो ।

यस्तै, सुनछहरी गाउँपालिकाको आर्थिक वर्ष २०८०/०८१ म कुल पुँजीगत खर्च ९ करोड २२ लाख ७ हजार रहेकोमा असार महिनामा मात्रै सो गाउँपालिकाले २ करोड १५ लाख ९३ हजार पुँजीगत खर्च गरेको थियो ।

यो खर्च सो गाउँपालिकाको कुल पुँजीगत खर्चको २३ प्रतिशत भन्दा बढी हो । सो गाउँपालिकाको प्रथम त्रैमासिक पुँजीगत खर्च ३९ लाख ८५ हरेको थियो । यस्तै दोस्रो त्रैमासिक पुँजीगत खर्च १ करोड ५५ लाख ७० हजार हुँदा तेस्रो त्रैमासिक पुँजीगत खर्च २ करोड ७२ लाख ४७ हजार रहेको थियो ।

सो गाउँपालिकाको चौथो त्रैमासिक पुँजीगत खर्च ४ करोड ५४ लाख ५ हजार रहेको थियो । जिल्लाको लुँग्री गाउँपालिकाको आर्थिक वर्ष २०८०/०८१ मा कुल पुँजीगत खर्च १३ करोड १८ लाख ७६ हजार रहेकोमा सो वर्षको असार महिनामा मात्रै सो गाउँपालिकाले ५ करोड ३० लाख ११ हजार खर्च गरेको थियो ।

असार महिनामा भएको यो खर्च गाउँपालिकाको कुल पुँजीगत खर्चको ४० प्रतिशत भन्दा बढी हो । उसले पहिलो त्रैमासिक पुँजीगत खर्च १ करोड १४ लाख ५५ हजार गरेको थियो ।

यस्तै, दोस्रो चौमासिक पुँजीगत खर्च १ करोड ५४ लाख ७९ हजार हुँदा तेस्रो त्रैमासिक पुँजीगत खर्च १ करोड ८८ लाख १ हजार रहेको थियो । सो गाउँपालिको अन्तिम त्रैमासिक पुँजीगत खर्च ८ करोड ६१ लाख ४० हजार रहेको थियो ।

रुन्टीगढी गाउँपालिकाको आर्थिक वर्ष २०८०/०८१ मा कुल पुँजीगत खर्च १४ करोड ९ लाख ७३ हजार रहँदा असार महिनामा ३ करोड ५६ लाख ३ हजार पुँजीगत खर्च गरेको थियो । असार महिनामा मात्रै भएको खर्च कुल पुँजीगत खर्चको २५ प्रतिशत भन्दा बढी हो ।

सो वर्ष रुन्टीगढी गाउँपालिकाको प्रथम चौमासिक पुँजीगत खर्च ५६ लाख ८१ हजार रहेको थियो । दोस्रो चौमासिक पुँजीगत खर्च २ करोड ९५ लाख ४० हजार रहेको सो गाउँपालिकाको अन्तिम त्रैमासिक पुँजीगत खर्च १० करोड ५७ लाख ५१ हजार रहेको छ ।

जिल्लाको माडी गाउँपालिकाले आर्थिक वर्ष २०८०/०८१ मा ९ करोड २० लाख ८७ हजार पुँजीगत खर्च गर्दा असार महिनामा मात्रै ४ करोड ५३ लाख ५२ हजार पुँजीगत खर्च गरेको थियो ।

असार महिनामा मात्रै गरेको यो पुँजीगत खर्च गाउँपालिकाको कुल पुँजीगत खर्चको ४९ प्रतिशत भन्दा बढी हो । उसको प्रथम त्रैमासिक पुँजीगत खर्च ६६ लाख ५२ हजार रहेको थियो । यस्तै, दोस्रो त्रैमासिक पुँजीगत खर्च ५८ लाख ४ हजार रहेको सो गाउँपालिकाको तेस्रो त्रैमासिक पुँजीगत खर्च १ करोड ९१ लाख ६९ हजार रहेको छ ।

सो गाउँपालिकाको अन्तिम त्रैमासिक पुँजीगत खर्च ६ करोड ४६ लाख रहेको थियो । त्रिवेणी गाउँपालिकाले आर्थिक वर्ष २०८०÷०८१ मा १३ करोड ६८ लाख ९१ हजार पुँजीगत खर्च गर्दा असार महिनामा मात्रै ४ करोड २९ लाख १४ हजार खर्च गरेको थियो ।

सो गाउँपालिको असार महिनामा मात्रै गरेको यो खर्च गाउँपालिकाको कुल पुँजीगत खर्चको ३१ प्रतिशत भन्दा बढी हो । सो गाउँपालिकाले प्रथम त्रैमासिक पुँजीगत खर्च १ करोड ६ लाख ८५ हजार गरेको थियो ।

उसले दोस्रो त्रैमासिक पुँजीगत खर्च १ करोड २४ लाख ५० हजार गर्दा तेस्रो त्रैमासिक पुँजीगत खर्च ३ करोड १९ लाख ३१ हजार रहेको थियो । सो गाउँपालिकाले अन्तिम त्रैमासिक पुँजीगत खर्च ५ करोड ७७ लाख २३ हजार गरेको थियो ।

जिल्लाको एक मात्र नगरपालिका रोल्पा नगरपालिकाको आर्थिक वर्ष २०८०/०८१ मा कुल पुँजीगत खर्च १६ करोड ८३ लाख ६३ हजार रहेकोमा सो वर्षको असार महिनामा मात्रै रोल्पा नगरपालिकाले ६ करोड ६६ लाख पुँजीगत खर्च गरेको थियो ।

नगरपालिकाले असार महिनामा गरेको यो पुँजीगत खर्च कुल पुँजीगत खर्चको करिब ४० प्रतिशत हो । रोल्पा नगरपालिकाले प्रथम त्रैमासिक पुँजीगत खर्च २ करोड ८६ लाख ६६ हजार गर्दा दोस्रो त्रैमासिक पुँजीगत खर्च १ करोड ३६ लाख ७९ हजार रहेको थियो ।

तेस्रो त्रैमासिक पुँजीगत खर्च २ करोड ६६ लाख ५३ हजार हुँदा चौथो त्रैमासिक पुँजीगत खर्च ९ करोड ९३ लाख ६५ हजार रहेको थियो । वर्षान्तमा हतारमा काम गराउँदा कामको गुणस्तर असर पर्ने भएकाले यसलाई नियमन गर्नुपर्ने महालेखा परीक्षकको प्रतिवेदनमा औँल्याइएको छ ।

उसले नियममा भएको व्यवस्था अनुरूप खर्च गरी असारमा खर्च गर्ने परिपाटी बन्द गर्नुपर्ने सुझाव समेत दिएको छ । महालेखा परीक्षकले हरेक वर्ष यस्तो सुझाव दिने गरे पनि रोल्पाका स्थानीय तहहरूले भने सुनुवाइ नगरेको स्थानीयहरूको भनाइ छ ।

अरू समयमा कामलाई प्राथमिकता नदिने फागुन महिनापछि मात्रै कामको सुरुआत गर्ने परम्पराले पुँजीगत बजेटको ठुलो हिस्सा असारमा खर्च हुने गरेको नेपाली काँग्रेस रोल्पाका पूर्व कोषाध्यक्ष खटकवहादुर खत्रीको भनाइ छ । असारमा भुक्तानी दिँदा अनुगमन समेत हतारमा हुने भएकाले कामको गुणस्तरमाथि प्रश्न उठ्नु स्वाभाविक भएको खत्रीको भनाइ छ ।