खोज

सल्यान, २३ असोज ।

सल्यानमा यान्टिबायोटिक औषधिको अत्यधिक र अनावश्यक प्रयोग बढ्न थालेपछि स्वास्थ्यकर्मीहरूलाई सचेत गरिएको छ ।

जिल्लाका सबै स्वास्थ्यकर्मीहरूलाई स्वास्थ्य सेवा कार्यालय सल्यानले एक सार्वजनिक सूचना नै जारी गरेर यान्टिबायोटिक औषधिको अत्यधिक र अनावश्यक प्रयोग रोक्न आग्रह गरेको हो ।

कार्यालयले यान्टिबायोटिकको दुरुपयोग रोक्न सचेत रहन, औषधि लेख्दा वा प्रयोग गर्दा सावधानी अपनाउन र रोगको प्रकृति अनुसार मात्र औषधि प्रयोग गर्न सबैलाई आग्रह गरेको छ ।

विश्वभर यान्टिबायोटिकको दुरुपयोगका कारण मानिस, पशुपक्षी, वनस्पति र वातावरणमा प्रति जैविक प्रतिरोधी ब्याक्टेरियाको तीव्र विकास भइरहेको उल्लेख गर्दै स्वास्थ्य सेवा व्यवस्थापक डाक्टर अर्जुन कुमार बुढाले भने, ‘यसले भविष्यमा सामान्य सङ्क्रमणहरूको उपचारमा समेत गम्भीर चुनौती र जोखिम उत्पन्न गर्न सक्ने अवस्था देखिएको छ ।’

उनका अनुसार सल्यान जिल्लामा पनि बिरामीहरूलाई आवश्यकभन्दा बढी यान्टिबायोटिक औषधि लेख्ने प्रवृत्ति बढ्दो छ ।

त्यसैले सबै स्वास्थ्य संस्था र स्वास्थ्यकर्मीहरूलाई कुन अवस्थामा यान्टिबायोटिक सिफारिस गर्न पाउने सम्बन्धी मापदण्ड एवं औषधिको सही प्रयोग सम्बन्धी कार्यक्रम अनिवार्य रूपमा पालना गर्न स्वास्थ्य सेवा कार्यालयको अनुरोध छ ।

दमाचौर स्वास्थ्य चौकी, छत्रेश्वरी गाउँपालिका, १ का इन्चार्ज रूपक चन्दले स्वास्थ्यकर्मीसँगै सेवाग्राही पनि सचेत बन्नुपर्ने बताए । उनले भने, ‘उपचारको नाममा गलत तरिकाले यान्टिबायोटिक औषधिको प्रयोगले मान्छेको स्वास्थ्यमा दीर्घकालीन गम्भीर असर पर्ने भएको हुँदा हामी स्वास्थ्यकर्मीहरू नागरिकको स्वास्थ्यमा सचेत हुनु हाम्रो दायित्व हुन्छ ।

सेवाग्राहीहरूले पनि आफ्नो स्वास्थ्यको ख्याल गर्न जरुरी छ ।’ जथाभाबी यान्टिबायोटिकको प्रयोगका कारण मानिसको शरीरमा यान्टिबायोटिकले काम गर्न छोड्दै गएको भन्दै विज्ञहरूले चिन्ता व्यक्त गर्दै आएका छन् ।