खोज

बुटवल ।

विपदका बेला अलपत्र परेका यात्रुहरूलाई उद्धार गर्नुपर्ने अवस्थामा नेपाल वायुसेवा निगमले उच्च भाडा असुली गर्दै चार्टर्ड फ्लाइट गरेको छ। निगमको विमानले सोमबार साँझ गौतमबुद्ध अन्तर्राष्ट्रिय विमानस्थलबाट १५४ यात्रु लिएर काठमाडौंको लागि उडान भरेको हो।

भारी वर्षाका कारण सडक यातायात बन्द हुँदा अलपत्र परेका यात्रुलाई आइतबार राति नै पठाउने तयारी भए पनि अन्तिम समयमा तयारी नपुगेपछि उडान स्थगित गरिएको थियो। सोमबार दिउँसो २:४५ बजे उडान हुने भनिए पनि तीन घण्टा ढिलो मात्र विमान उडेको प्रहरीले जानकारी दिएको छ।

निगमले काठमाडौं–भैरहवा मार्गमा ५ हजार र भैरहवा–काठमाडौं मार्गमा ७ हजार रुपैयाँ भाडा तोकेको थियो। तर विपदका कारण घर फर्किन वा काठमाडौं पुग्न बाध्य भएका यात्रुबाट यति उच्च भाडा लिइनु उपयुक्त नभएको भन्दै केही यात्रुले असन्तोष व्यक्त गरेका छन्।

रूपन्देहीका प्रमुख जिल्ला अधिकारी डा. टोक राज पाण्डेका अनुसार राति नै काठमाडौं पुग्नुपर्ने बाध्यता भएका, बिरामी, अध्ययन तथा रोजगारीका लागि विदेश जान टिकट लिइसकेका व्यक्ति र पर्यटकलाई प्राथमिकता दिइएको थियो। तर उद्धारका समयमा पनि यात्रुहरूबाट सात हजार रुपैयाँसम्म असुल्नुले सरकारी सेवाप्रति प्रश्न उठाएको छ।