खोज

काठमान्डौ, २० असोज ।

परम्पराअनुसार प्रधानमन्त्री पदबाट बिदा लिँदा अघिल्ला प्रधानमन्त्रीले प्रयोग गर्दै आएका सामाजिक सञ्जालका युजरनेम र पासवर्ड नयाँ प्रधानमन्त्रीलाई हस्तान्तरण गरिन्छ । कारण, ती अकाउन्टहरू सरकारका आधिकारिक सम्पर्क माध्यमका रूपमा मानिन्छन् ।

तर, जेनजी युवा आन्दोलनबाट सत्तामा पुगेकी प्रधानमन्त्री सुशीला कार्कीले भने अघिल्ला प्रधानमन्त्री केपी शर्मा ओलीले प्रयोग गर्दै आएका सामाजिक सञ्जाल अकाउन्टहरू प्रयोग नगर्ने निर्णय गरेकी छन् । उनले फेसबुक, एक्स (ट्विटर) र इन्स्टाग्राममा नयाँ अकाउन्ट खोलेकी छन् ।

प्रधानमन्त्री तथा मन्त्रिपरिषद् कार्यालयका सहसचिव एवम् प्रवक्ता रविलाल पन्थले जारी गरेको विज्ञप्तिअनुसार प्रधानमन्त्री कार्कीले प्रयोग गर्ने नयाँ अकाउन्टको युजरनेम अघिल्ला प्रधानमन्त्रीहरूले प्रयोग गर्दै आएकोभन्दा फरक रहेको छ ।

विज्ञप्तिमा उल्लेख अनुसार, अघिल्ला प्रधानमन्त्रीहरूले एक्समा @PM_nepal  ह्याण्डल प्रयोग गर्दै आएका थिए भने प्रधानमन्त्री कार्कीले अबदेखि एक्स  ह्याण्डल @pmsushilakarki प्रयोग गर्ने भएकी छन् ।

प्रधानमन्त्री कार्यालयका अधिकारीहरूका अनुसार यो निर्णय प्रधानमन्त्री कार्कीको इच्छाअनुसार गरिएको हो ।

प्रधानमन्त्री कार्कीका प्रमुख सल्लाहकार अजयभद्र खनालका अनुसार पुरानो अकाउन्ट प्रयोग गर्दा अघिल्ला प्रधानमन्त्री ओलीका गतिविधि र सामग्रीहरू देखिने भएकाले नयाँ अकाउन्ट सञ्चालन गरिएको हो ।

खनालका अनुसार ओलीको सचिवालयले केवल एक्स (ट्विटर) अकाउन्ट मात्र हस्तान्तरण गरेको छ, त्यो पनि आइतबार मात्रै । फेसबुक र इन्स्टाग्राम अकाउन्ट भने अझै हस्तान्तरण भएको छैन । त्यसैले ती दुवै प्लेटफर्ममा नयाँ अकाउन्ट खोलिएको उनले बताए ।

हाल प्रधानमन्त्री कार्कीको सचिवालयसँग ओलीको सचिवालयले चलाउँदै आएको @PM_nepal र नयाँ खोलिएको @pmsushilakarki दुवै एक्स अकाउन्टमा पहुँच छ । तर दैनिकरूपमा नयाँ अकाउन्ट नै प्रयोग भइरहेको खनालले बताए ।

उनका अनुसार नयाँ अकाउन्टमा प्रकाशित सरकारी सूचनाहरू आवश्यकतानुसार पुरानो अकाउन्टबाट पनि रिट्वीट गरिने गरिएको छ । फेसबुक र इन्स्टाग्राम पेज सञ्चालनसम्बन्धी प्राविधिक समन्वयको काम भइरहेको उनले जानकारी दिए ।