खोज

गुल्मी, २० असोज ।

सुख्खा पहिरोका कारण मदन भण्डारी राजमार्ग अन्तर्गत गुल्मीको रिडी‐तम्घास सडक खण्ड अवरुद्ध बनेको छ । उक्त सडक खण्ड अन्तर्गत रुरुक्षेत्र गाउँपालिका ‐३ स्थित पानीटंकी नजिकै सडक माथिबाट ठुलो चट्टान सहितको सुख्खा पहिरो खसेपछि आज बिहानदेखि उक्त सडक अवरुद्ध बनेको हो ।

मुख्य सडक अवरुद्ध बनेपछि अहिले सदरमुकाम तम्घास भित्रिने र बाहिरिने सम्पूर्ण सवारी साधनहरू रुरुक्षेत्र ‐३ को पानी टङ्कीदेखि सालबिसौना हुँदै वैकल्पिक सडक प्रयोग गरी सवारी साधनहरू सञ्चालन गरिएको जिल्ला प्रहरी कार्यालय गुल्मीका सूचना अधिकारी एवं प्रहरी नायव उपरीक्षक गङ्गा बहादुर सारूले जानकारी दिएका छन् ।
अवरुद्ध सडक सुचारु गर्नका लागि सडक निर्माण कम्पनी र गाउँपालिकाको सहयोगमा डोजर र एक्स्काभेटर तयारी अवस्थामा राखिएको रुरुक्षेत्र गाउँपालिका अध्यक्ष यदु ज्ञवालीले बताएका छन् ।

अहिले उक्त क्षेत्रमा सडक सुचारु गर्न पहल गरिएको भए पनि पहिरो खस्ने क्रम नरोकिएको र सडकमा ठुला चट्टानहरू थुप्रिएको हुँदा सडक सुचारु गर्न केही समय लाग्ने बताइएको छ ।

मदन भण्डारी राजमार्ग अन्तर्गत गुल्मीको रिडी–तम्घास सडक खण्डमा यति बेला समानान्तर जेभी र ईलाईट कम्पनीद्वारा २५ किलोमिटर सडक चौडा पार्ने र कालोपत्रे गर्ने काम भइरहेको छ ।