खोज

लमही, २० असोज । 

राप्ती स्वास्थ्य विज्ञान प्रतिष्ठानमा आर्थिक वर्ष २०८१/०८२ मा उपचार गर्न आउने बिरामीको सङ्ख्या ह्वात्तै बढेको छ । प्रतिष्ठानको बहिरङ्ग र अन्तरङ्ग गरेर २ लाख १८ हजार ७९ जना बिरामीले चालु आवमा सेवा लिएका हुन् ।

जसअनुसार बहिरङ्ग सेवा २ लाख ४ हजार १ सय जना र अन्तरङ्ग सेवा १३ हजार ९ सय ७९ जनाले लिएका छन् । प्रतिष्ठानले दिएको जानकारी अनुसार आर्थिक वर्ष २०८०/०८१ मा बहिरङ्ग र अन्तरङ्ग १ लाख ७६ हजार ९ सय ७४ जना बिरामीले सेवा लिएका छन् । जसमा बहिरङ्ग सेवा १ लाख ६८ हजार ५ सय २२ जना र अन्तरङ्ग सेवा ८ हजार ४ सय ५२ जना बिरामीले पाएका छन् ।

त्यस्तै आर्थिक वर्ष  २०७९/८० मा बहिरङ्ग र अन्तरङ्ग गरेर १ लाख ६० हजार ६ सय ५८ जना बिरामीले सेवा पाएका छन् । जसमा बहिरङ्ग सेवा १ लाख ५३ हजार ५ सय र अन्तरङ्ग सेवा ७ हजार १ सय ५८ जना बिरामीले उपचार सेवा प्राप्त गरेको प्रतिष्ठानका सूचना अधिकृत निशानदाजु भट्टराइले जानकारी दिए ।

प्रतिष्ठानका रजिस्ट्रार प्रा‍. श्याम लम्सालले प्रतिष्ठानमा विशेषज्ञ सेवा र अत्याधुनिक उपकरणहरू थपिँदै गएपछि सेवा विस्तार हुँदै गएको बताएका छन् । उनले प्रतिष्ठानलाई पश्चिम नेपालकै स्वास्थ्य क्षेत्रको हव बनाउने गरी अघि बढेको भन्दै यसको विकास र विस्तारमा सामुहिकरुपमा पहल र आवश्यकता रहेको औँल्याए ।

रजिस्ट्रार लम्सालले दिएको जानकारी अनुसार प्रतिष्ठानले गएको आर्थिक वर्षदेखि न्युरो सर्जरी सेवा सुरु गरेको, आगामी मङ्सिर महिनाभित्र क्याथ्ल्याव सेवा सुचारु गरी मुटु रोग उपचार सुरु गर्ने, युरोलोजि र युरो सर्जरी सेवा सुचारु रहेको छ ।

त्यस्तै उनका अनुसार ४ सय शैया अस्पताल यसै आवमा निर्माण सुरु हुने, सामुदायिक सेवा अन्तरगत रोल्पाको होलेरी र त्रिवेणिमा सेवा सुरु गरेको र एमबिबिएस कार्यक्रम सहजरुपमा सञ्चालनमा रहेको छ । प्रतिष्ठानमा हाल ३ सय २० बेड चालु अवस्थामा रहेको छ ।