खोज

सल्यान, १९ असोज ।

कोजाग्रत पूर्णिमाको अवसरमा लाग्ने सल्यानको सबैभन्दा ठूलो कुमाख मेलामा कुनै पनि चन्दा वा कर असुली गर्न नपाइने भएको छ । सिद्ध कुमाख गाउँपालिकाले आफ्नो क्षेत्रभित्र लाग्ने मेलामा कुनै पनि व्यक्ति, समूह वा संस्थाले कुनै नाममा चन्दा वा कर असुल नगर्न अनुरोध गरेको छ ।

यदि कसैले गाउँपालिकाको निर्णय विपरीत चन्दा वा कर असुल गर्ने कार्य गरेको पाइएमा सम्बन्धित व्यक्तिले तुरुन्तै गाउँपालिकामा जानकारी गराउन पनि आग्रह गरिएको छ । विगतका वर्षहरूमा स्थानीय क्लब, समूह वा मेला व्यवस्थापन समितिका नाममा स्थानीय व्यापारीहरूसँग चन्दा वा कर असुल गरेको गुनासोहरू प्राप्त भएको भन्दै गाउँपालिकाले यस वर्ष कडाइ गरेको हो ।

गाउँपालिका अध्यक्ष भरत गिरी, उपाध्यक्ष रामबहादुर बस्नेत र प्रमुख प्रशासकीय अधिकृत दिपेन्द्र कंडेलले संयुक्त रुपमा आइतबार एक सूचना जारी गर्दै यस्तो आग्रह गरेका हुन् । परम्परागत कुमाख मेलालाई सभ्य, सुसंस्कृत र भव्य ढङ्गले मनाउन पालिकाले सर्वसाधारणमा अनुरोध गरेको छ । गाउँपालिकाले देशभर बाढी, पहिरो लगायतका विपद्का कारण जनधनको क्षति भइरहेको सन्दर्भमा विशेष सावधानी अपनाउँदै मेलामा सहभागी हुन पनि आग्रह गरेको छ ।

जिल्लाकै दोश्रो अग्लो लेकको रुपमा परिचित कुमाखमा कोजाग्रत पूर्णिमाको दिन लाग्ने मेला यहाँको सबैभन्दा ठूलो र ऐतिहासिक मेला मानिन्छ । यस मेलामा जिल्लाका विभिन्न ठाउँ तथा छिमेकी जिल्लाबाट समेत श्रद्धालु एवं दर्शकको बाक्लो उपस्थिति रहने गर्दछ । परम्परागत नृत्य, गीत, सांस्कृतिक प्रस्तुति तथा स्थानीय उत्पादनको व्यापार, व्यवसाय यसको प्रमुख आकर्षण हुने गर्दछ ।

गाउँपालिकाले मेलाको महत्वलाई जोड दिँदै स्थानीय उत्पादित वस्तुहरूको प्रदर्शन र व्यापारलाई प्रोत्साहन गर्न, परम्परागत नाचगान, कला र संस्कृतिको संरक्षणमा जोड दिएको छ । सिद्धकुमाख गाउँपालिकाले मेलालाई सांस्कृतिक एकताको प्रतीक र स्थानीय पहिचानको उत्सवका रूपमा मनाउन सबैमा आह्वान गरेको छ ।