खोज

काठमान्डौ, १९ असोज ।

केही समयदेखि अवरुद्ध रहेको काठमाडौं उपत्यकाको यातायात मौसम केही अनुकूल भएपछि सामान्य बन्दै गएको छ । यात्रुहरू काठमाडौं भित्रिने र बाहिरिने क्रम पुनः सुरु भएको छ ।

काठमाडौं उपत्यका ट्राफिक प्रहरी कार्यालयका प्रवक्ता नरेशराज सुवेदीका अनुसार, पछिल्लो २४ घन्टामा काठमाडौंका विभिन्न नाकाबाट २ हजार ६४८ जना भित्रिएका छन् भने २ हजार २६४ जना उपत्यकाबाट बाहिरिएका छन् । भित्रिने सवारी साधनको संख्या ५४० रहेको छ भने बाहिरिने सवारी साधन ४६५ पुगेको छ ।

पानी पर्न रोकिएसँगै सरकारले काठमाडौं भित्रिने र बाहिरिने सडक मार्ग खोल्ने तयारी गरेको छ । बीपी राजमार्गबाहेक अन्य राजमार्गहरूमा गाडी सञ्चालन गर्ने तयारी भइरहेको भौतिक पूर्वाधार तथा यातायात मन्त्रालय स्रोतले जानकारी दिएको छ ।

मन्त्रालयका अनुसार, काठमाडौं–नारायणगढ र काठमाडौं–पोखरा सडक खण्डमा यातायात सञ्चालनका तयारी भइरहेको छ ।

बाढी पूर्वानुमान शाखाका प्रमुख विनोद पराजुलीका अनुसार, हाल वर्षा रोकिएको छ र ठूलो पानी पार्ने प्रणाली मध्यक्षेत्रबाट बाहिरिएकाले ठूलो पानी पर्ने सम्भावना छैन । साथै, आज दिउँसोबाट पूर्वी क्षेत्रबाट वर्षा गराउने प्रणाली निष्कृय हुने सम्भावना रहेको छ ।

सरकारले वर्षा र बाढी–पहिरोको जोखिमलाई मध्यनजर गर्दै असोज १८, १९ र २० गतेसम्म तीन दिन काठमाडौं भित्रिन र बाहिरिन रोक लगाएको थियो । मौसम सफा भएपछि उपत्यकामा आवतजावत क्रमिक रूपमा सञ्चालन भइरहेको छ ।