© 2026
१५ माघ २०८२, बिहीबार
१५ माघ २०८२, बिहीबार
काठमाडौं, १९ असोज ।
पानी पर्न रोकिएसँगै सरकारले काठमाडौं भित्रिने र बाहिरिने सडक मार्गहरू खोल्ने तयारी गरेको छ । बीपी राजमार्गबाहेक अन्य मुख्य राजमार्गमा सवारी सञ्चालन गर्ने तयारी भइरहेको छ ।
जल तथा मौसम विज्ञान विभागले पश्चिमतर्फ यातायात सञ्चालन गर्न सकिने भन्दै सम्बन्धित सरकारी निकायहरूलाई सूचना दिएको छ ।
भौतिक पूर्वाधार तथा यातायात मन्त्रालय स्रोतका अनुसार काठमाडौं–नारायणगढ तथा काठमाडौं–पोखरा सडकखण्डमा सवारी साधन सञ्चालन गर्न तयारी थालिएको छ ।
“अहिले केही स्थानमा साना पहिरोहरू छन् । ती हटाएपछि पश्चिमतर्फ जाने बाटो खुला हुनेछ । थप पानी पर्ने सम्भावना नरहेको सूचना प्राप्त भएकाले यातायात सञ्चालन गरिनेछ,” मन्त्रालय स्रोतले जानकारी दिएको छ ।
बाढी पूर्वानुमान शाखाका प्रमुख विनोद पराजुलीका अनुसार हाल वर्षा रोकिने क्रम सुरु भइसकेको छ । ठूलो पानी पार्ने प्रणाली मध्यक्षेत्रबाट बाहिरिसकेको र पूर्वी क्षेत्रमा पनि आज दिउँसोभित्र प्रणाली निष्क्रिय हुने सम्भावना रहेको उनले बताए ।
सरकारले बाढी, पहिरो र वर्षाको जोखिमका कारण असोज १८, १९ र २० गते तीन दिनका लागि काठमाडौं प्रवेश र बहिर्गमनमा रोक लगाएको थियो । तर, अनुमानभन्दा छिटो मौसममा सुधार आउन थालेकाले पश्चिमतर्फको सडक सञ्चालनका लागि मौसम अनुकूल हुँदै गएको जल तथा मौसम विज्ञान विभागले जनाएको छ ।
© 2026
All rights reserved.
Design & Developed By:
