खोज

काठमाडौँ ।

बीमा कम्पनीहरूले सामाजिक उत्तरदायित्व (सिएसआर) अन्तर्गतको रकम अब सरकारद्वारा सञ्चालित पुनर्निर्माण कोषमा खर्च गर्न पाउने भएका छन् ।

सरकारले विभिन्न जनप्रदर्शन तथा विपद्‌का कारण क्षतिग्रस्त संरचनाहरूको पुनर्निर्माणका लागि छुट्टै कोष स्थापना गरेर सहयोग संकलन गरिरहेको छ । सोही प्रयासलाई सघाउने उद्देश्यले बीमा समितिले ‘बीमकको संस्थागत सुशासन सम्बन्धी (दोस्रो संशोधन) निर्देशिका, २०८२’ जारी गरेको हो ।

समितिले निर्देशिकाको दफा ४५ मा संशोधन गर्दै अबदेखि प्राकृतिक प्रकोप, नागरिक आन्दोलन, जनप्रदर्शन वा अन्य कारणले भएको क्षतिको पुनर्निर्माण, आर्थिक पुनरुत्थान तथा राहतलगायतका कार्यमा खर्च हुने रकमलाई सामाजिक उत्तरदायित्वअन्तर्गत समावेश गर्न सकिने व्यवस्था गरेको छ ।

बीमा कम्पनीहरूले हरेक वर्ष आफ्नो नाफाको एक प्रतिशत सामाजिक उत्तरदायित्वमा खर्च गर्नुपर्ने कानुनी व्यवस्था छ । यसअघि भने जनप्रदर्शन वा यस्ता घटनाबाट भएको क्षतिको पुनर्निर्माणमा गरिएको खर्चलाई (सिएसआर) अन्तर्गत देखाउन मिल्ने वा नमिल्ने भन्ने विषय स्पष्ट थिएन ।

अब भने बीमा कम्पनीहरूले सरकारको पुनर्निर्माण कोषमा सहयोग स्वरूप रकम दाखिला गरी त्यसलाई सामाजिक उत्तरदायित्व अन्तर्गत देखाउन सक्ने व्यवस्था गरिएको छ ।